No.2534/2021-2022
Dated Aizawl, the 8th October, 2021: Vawiin khan Serchhip District Cleanliness Week, 2021 kharna DC Conference Hall ah buatsaih a ni a, bawrhsap Pu Kumar Abhishek, IAS chu khuallian a ni.

Khuallian chuan faina lamah Mizote kan thangharhin fai hlutzia kan hre tlang tawh viau a, a lawmawm hle a ni. Amaherawh chu fai tura hmalakna pawimawh tak tak leh khuarei daih tur chi lamah erawh tan kan lak leh deuh a tulin a lang. Kan bawlhhlawh tawih thei chite chhungtinten leithaa chantir uar ila, tin kan hmanraw hluite thildanga leha, tangkai taka hman theih dan dap uar bawk ila, Plastic lam chite fel taka thliarin sawrkar dan angin paih zel bawk ila, he ram hi nakin thlenga kan tu leh fate chenna tlakah kan siam ngei dawn a ni, a ti. Faina Hapta chhunga hmalakna chi hrang hranga mawhphurtute, veng chhung leh mahni in leh a chhehvel tifaia beitu zawng zawngte chungah lawmthu a sawi a. District fai inelna neih zui lehnghal a nih avangin mitinin theihtawp chhuah zui zel turin a sawm bawk a ni.

Faina Hapta chhunga inelna hrang hranga lawmman te sem a ni a, Faina lam hawi thuziak tam nitin chanchinbu lawmman dawngtute chu; pakhatna Serchhip Times, pahnihna Lenkawl Daily Newspapers leh pathumna Laisuih Daily Newspapers te an ni a. Thlalak intihsiaka lawmman latute chu: pakhatna B. Vanlalthazuala, pahnihna RL Hlupuia leh pathumna C. Lalrochhuanga te an ni a. Videography (1 minute mobile video clip) intihsiaka lawman dawngtute chu: pakhatna Vanlalhruaizela, pahnihna Lalhmachhuana leh pathumna RL Hlupuia te an ni a.

Hapta kharna inkhawm hi Pu K. Saitluanga, DIPRO in a kaihruaia, Pu Albert Vanlalliantluanga, DUDO in faina Hapta chhunga hmalakna chi hrang hrangte sawifiahna neiin, Pi Lawmzuali, Manager, DUDO in hapta chhunga hmalakna hrang hrangte thlalak leh video te phochhuahna hun a hmang a ni.