No.2535/2021-2022
Aizawl 8th October, 2021 : Vawiin khan DC Conference Hall, Mamit-ah kumin 2021 (2nd - 8th October) Faina Hapta kharna hun hman a ni a. Dr. Lalrozama, IAS, District Bawrhsap chuan khuallian niin he hun hi a hmanpui.

Khuallian chuan faina kawnga thawktu zawng zawngte chungah lawmthu sawiin Faina Hapta hman chhung chauh fai kan tum tur a ni lo a, kan hmalam hunah a te ber atanga kan zavaiin fai tura tan lak thar nan hapta kan hman tak chu chhawr tangkai theuh turin District mipuite a sawm. Hmasawnna leh hlawhtlinna hi ataka hmuh tur a awm hian mipuite hnen a thleng thin a, Faina kawnga thawktu Department-te pawh mipui tiharh ngei tura an hmalakna-ah hlawhtlinna hmu zel tura thawk turin a chah a ni. Faina Hapta chhunga Mamit khawpui chhung veng hrang hrangah kan veng faina tura mimal inpe kan awm zel chu lawmawm a tih thusawiin midangte pawhin chona-ah ngaia hmalatu nih kan tum a pawimawh a ni a ti.

District Bawrhsap chuan Mizoram pum huap fai inelna-ah lawmman la ngei tura mahni zawn theuha ngaihtuahna senga tan kan lak a pawimawh thu sawiin khawdang/hmundang a mite tan chauha lawmman hi siam a nilo a, kan tum a, theihtawpa kan beih chuan Mizoram puma fai ber nihna chu kan hauh thei ngei a ni a ti bawk.

Hrileng avanga kan inkhuahkhirhna phelh dul hret hret a ni chu, hri a tlem ta deuh a, a hlauhawm ta lo ni lovin invenna fimkhur leh zual zawka kalpui a, kan nitin khawsakphung tibuai lova kal zir nan kan hman a duh thu District Bawrhsap hian a sawi bawk.

Pu Zodinsanga, Colney, Manager ( NULM) chuan kumin 2021 faina hapta hman dan chungchang report pein Hapta hman chhunga hmalakna hrang hrang a lem nen a entir a ni.

Faina Hapta puala buatsaih lawmman hrang hrangte Khuallian hian sem nghalin Mamit khawpui chhunga veng fai ber lawmman hi Mamit Bazar vengin an dawng a. Photography Competition-ah pakhatna Darthanmawia Chhangte, Kawrthah niin pahnihna hi TP Chawngthu, Mamit Bazar veng a ni a. Lawmman pathumna hi Jenny Lalawmpuii, Luangpawl Mamit-in a dawng a ni. 1 Minute Mobile Video Clip Making Competition-ah lawmman pakhatna hi Zorina Fanai, Zawlnuam khuain a dawng a. Lawmman pahnihna hi Zoremsanga, Field veng Mamit-in dawngin lawmman pathumna hi YMA 'A' Section Kawrthah te'n an dawng a ni.

Kumin Faina thupui atan hian "Faina kan in leh a chhehvel atangin" tih chu hman a ni a. Faina kharna hun hi Pu C. Sawihlira, DUDO chuan kaihruaiin lawmthu sawina a nei nghal bawk a ni.

He hun hi hrileng avanga mipui nawlpui kal khawm a rem loh avangin Cleanliness Week Committee Members te, Local Ambassador parukte bakah mi sawmbikte an tel a ni.