No.2536/2021-2022
Aizawl the 10th October, 2021: Vawiin khan Convention Centre Hall, Lungleiah Faina Hapta 2021 kharna hun hman a ni. He hun hi Dr.K.Pachhunga, MLA Lunglei South leh Vice-Chairman, Mizoram Bamboo Development Board chuan khuallian niin hun a hmanpui.

Dr.K.Pachhunga chuan thu sawiin, Urban Development and Poverty Alleviation Department te thahnemngaihna leh thawhrimna zarah Lunglei District-in faina kawngah nasa takin hma kan sawn hi a lawmawm takzet a ni, a ti a. Lunglei khawpui chu Department leh sawrkarin a phiat fai vek seng lova, Lungleia pawl hrang hrang leh mipui tan rualna avanga fai thei a nih thu sawiin faina kawngah thahnem ngai zui zel turin kal khawmte a ngen a ni. Dr. K. Pachhunga chuan pawnlam faina mai bakah chhung lam rilru thianghlim leh hrisel neih a tul thu sawi bawkin mipuiten sawrkarah engkim beisei fai vek lova kan tih ve theih chin kan tih ve hian hmasawnna a thleng thin tih a sawi a ni.

Pu M.Misael, Additional Deputy Commissioner, Lunglei & Member, Lunglei Town Sanitation Task force chuan vawiin program hi a kaihruai a. Pi Vanthangpuii, District Urban Developent Officer, Urban Development and Poverty Alleviation Department, Lunglei in Faina Hapta 2021 chhunga Lunglei District-a hmalakna tlangpui a tarlang a. Faina Hapta chhung khan VC, NGO-te nen tangkawpin Lunglei District-ah faina beihpui thlak niin chhung tin te mahni in leh a vel tihfai hnatlang neiin vengchhung tihfai hnatlang (voluntary) huaihawt niin ‘A hmunlo a bawlhhlawh paihtute ngaihhnathiamloh Ni (No Tolerance Day for Waste Disposal) hman a ni a. Department-ten an pisa theih tihfai hnatlang an nei bawk a ni. Fiana Hapta chhung hian Sanitation Task Force member-te inspection in an chhuak bawk a ni.

Vawiina faina hapta kharna inkhawmah hian Faina hapta puala Photography leh 1 minute Video Clip inelna buatsaih lawmman hlanna hun neih a ni a.

Photography a lawmman dawngtu te chu-
1. Sangtea Tlau
2. C. Lalhmangaihzuala
3. Lalthanzama Hauheng

1 minute Video Clip a lawmman dawngtu te chu-
1. C. Lalhmangaihzuala
2. Chhana Bawlte
3. M.C. Zoengpuia te an ni.