No.2007/2021-2022
Dated Aizawl, the 26th August, 2021: Vawiin khan Serchhip BNRGSK Hall ah Government Serchhip Higher Secondary School a hmeichhe zirlai naupang thlan bikte tan BBBP My Aim My Target Career Awareness Campaign buatsaih a ni a. Mithiam pahnihten zirlai naupangte eizawnna lama an tinzawn theih tur chi chi hrang hrang an zirtir.

He hun kaihruaitu Pu K. Saitluanga, DIPRO chuan, Beti Bachao Beti Padhao Serchhip District hmalakna tlangpuite sawi hmasain; vawiina zirlai hmeichhe naupang thlan bikte puala Awareness Seminar an neih chhante a sawifiah bawk a. My Aim My Target Action Plan duan lai hian Covid19 hripui vanga mi 30 chin chauh punkhawm phal a nih lai a nih avangin mi 30 tel theihna tur programme an duang a, chuvang chuan vawiinah pawh Government Highe Secondary School-a zirlai hmeichhia zawng zawngte tel lovin, thlan bikte chauh an tel phah ta a ni, a ti a. A hmuna tel ve ta lo te tan nizan lamah Lalro Digitals Studio a Live Talk Show buatsaih niin Lalro Digital Youtube Channel ah en theihin a awm reng a, tin Cable TV dangah pawh tihchhuah zui zel tum a ni, a ti. Tin, Seminar-a tel hmeichhiate hi an nih tum (aim in life/ target job) zawh nghal vek niin, heng an nih tum hna lo thawk mektu Officer leh midangte nena inkawm hona hun remchang siam sak zui leh an ni ang a, chungte pawh chu Cable TV lamah la tihchhuah zui zel tum a nih thu a tarlang bawk.

Vawiina Seminar-ah hian Pu Lalhruaitluanga, Founder, Zocareer Solutions leh Pu C. Lalhriatpuia, MD, Hillsgate ten naupangte hi Higher Secondary an chhuah ruala an hna zawn zui theih hrang hrangte, zir zawm zel duhte tana kal zel dante, mahnia eizawnna din duhte tana bul tan chhoh dan leh thil pawimawhte chipchiar takin zirtirna an pe a ni.