Government T. Romana College chuan vawiin khan Vanapa Hall ah Freshers’ Social cum Graduation Day, 2016 an hmang a. Pu R.Romawia, Minister, Higher & Technical Department leh Pu R.Vanlalvena Bialtu MLA, Aizawl South -1 te chuan he hun hi hmanpui in nilenga hun hman a ni.

Pi leh Pu hun lai atang tawh in Zirthiamna-Education hi Mizo ten kan ngaisang in kan hlut thu khuallian Pu R Romawia chuan sawiin Bank-a pawisa dah a pung lo awm, hlawkna neih ang nen tehkhinin Education hi ‘investments’ tha tak a ni a, a tir atanga zir in, thiam nghal zel anih chuan hun tawp Exam hmachhawn hunah pawh phili buai tam lovin pass mai theih a ni a ti a. Govt.T Romana College chuan Principal leh thawktu, zirtirtu fel leh tha tak tak an neih avangin hma an sawn zel a beisei awm a ni a ti. T.Romana College in hmun hma an neih tam loh zia a hriatpui thu leh bialtu MLA Pu R Vanlalvena ngei pawhin hmun tha zawk an neih theih na tura hma a lakpui thu sawiin khuallian chuan tunah vanneihthlak takin Republic Vengthlang in an veng chhunga Middle School hmun tha tak Govt.TRC tana an pawmpui na leh Republic Vengthlang mipui te in hawnna leh phurpui na ah fakawm a ti a. Chutihlaiin Pu T Romana leh a chhungte’n zirna tha nei tura an hmun phal taka an lo pek ah lawmthu a sawi bawk a ni.

Mizo te hi hnam vannei tak khawvel huap pawh in kan ni a, hnam thenkhat duh loh leh hnawhchhuah an awm lain Mizo te chu kan thlen chin apiangah lawm kan hlawh thin, he kan vanneihna hi hmang tangkaiin keimahni ah hian Pathianin eng nge ti tura min duh, a ram zau nan leh amah chawimawi turin a ni ngei ang tih chu vawng tlat tur in Minister chuan zirlai te chu a chah a. Fel leh tha emaw kan intih lai hian siam that tulna pawh Mizo te hian kan nei, mi thawhchhuah sa huanthlai, balhla, zawngtah leh a dangte lo ruksak hreh miah lo te an awm ta, thawm riva duhawm lo mahni nunna lak leh pipu te duh loh leh chin ngai loh te hriat tur a awm ta fo mai. Hnam boral kan nih lohna turin heng kan Mizo ze dik tak te hi kan chhawm nun leh a ngai a ni, tiin Pu R Romawia chuan Lungrualna nen ke pen a, pipu te ze tha, kristian rilru pu in, hma lam hun eng tak nei turin zirlaite chu duhsakna a hlan.

Khual zahawm Pu R Vanlalvena, Aizawl South 1 bialtu MLA pawhin zirlai te nun uluk a pawimawh zia leh an kal zelna tur fimkhur taka thlir thiam a ngaihthu sawiin vawiin a thian kawm mek, kianghnaia awm thin te chu kum sawm hnu ah thiantha an la ni ang em tih ngaihtuah thiam a, zirtirtu te thiamna chhawr tangkai thiam turin a chah a, TRC magazine Raltiang a tlangzarh nghal a ni.

Govt.T Romana College Principal Pu Lalrintluanga’n ‘Turning Tassles for the new Graduates’ hun hmangin zirlai pass tharte Diploma Certificates hlanin, fuihna thu tha tak a sawi bawk.

Govt. T Romana College hi kum 1992 a din a ni a. Arts subject hrang hrang zirna kalpui mek a ni. Tunah hian National Assessment & Accreditation Council (NAAC) chuan ‘B’ Grade Accreditation a pe a. ‘B’Grade Accredited College a ni.

Kum 2016 – 2017 Academic Session ah zirlai 894 an awm mek. Hetiangin : 1^st Semester – 336; 3^rd Semester – 298; 5^th Semester – 260, an vaiin 894.

Zirtirtu 34 awmin office staff 18 an awm mek a. Tunhnaia MZU in Under Graduate result a tih chhuah ah khan Govt. T Romana College zirlai 3 chu University Rank Holder ah awmin Mizo Department ah 7 na leh Education Department ah 6 na leh 9 na ah an awm a ni.