Finance Minister Pu Lalsawta chuan tukin khan a bial, Aizawl East-II huam chhung Tuithiang Venga MLA
Development Fund hmanga hnathawh mek – Tuithiang Presbyterian Kohhran Biak In panna kawng siam chu a hmunah a enfiah a. Khawtlang hruaitute leh tlawmngai pawl hrang hrang te nen Tuithiang Veng Community Hall-ah vengchhung mamawh leh harsatnate sawiin hmalakna tur pawimawhte an sawiho bawk.
Minister chuan mipuite puihna tur țanpuina pek satliah mai nilovin, a țang te țanpui chu Sorkar thil tum a nih thu a sawi a. NLUP kalpui zel chungin tunah hian hmasawnna bung thar atan New Economic Development Policy chu kalpui tum leh mek a ni a. Hemi hnuaiah hian mi taima, mithiam leh dinchhuah tum ten agriculture, horticulture, ran vulh leh industry lamah te an inthlurbing ang a. Sorkar chuan an mamawh intawm, mimal leh pawl pawha lei zawh si loh heng - warehouse-te, khawl lian, kawng tha leh inbiakpawhna tha zawk buatsaih leh hriselna lama inenkawlna mamawhte chu a ngaihtuah ve thung dawn a ni, a ti a.
Finance Minister chuan Mizoram hi Sorkar laipui atanga sum haichhuaha innghat lova mahni thawhchhuah a intodelh theihna kawng kan neih that thu sawiin, a chumi atan chuan midang puihna beisei ringawt lova, kan tih theih theuh leh thawh theih theuh chu hreh miah lovin leh thahnemngai taka thawh hmasak a pawimawh thu a sawi a ni.
Tuithiang Presbyterian Kohhran Biak In panna kawng siamna atan hian cheng nuai 9 sing 5 sanction a ni a. Minister Pu Lalsawta chuan Biak In pantu te tan mai nilo khawtlang tana kawng tangkai leh mamawh tak anih thu leh, tha taka an zawhfel theih a beisei thu a sawi a ni.
Finance Minister hian tunkar chhung hian a bial chhunga Chhinga Veng leh Dawrpui Veng-a MLA Fund leh State Plan Fund hnuaia hnathawh te a enfiah leh dawn a ni.
