Vawiin chawhma dar 10.00 khan Govt. T. Romana College chuan Vanapa Hall-ah an College Week vawi 19-na kharna inkhawm leh kumina an college atanga graduate tharte thlahna inkhawm an hmang a; Higher & Technical Education Minister Pu Lalsawta chuan a hmanpui.

Pu Lalsawta chuan, “Mizoram hi a ram hmelhmang avang hian hmasawnna kawng tam takah rual el pha thei lovin kan awm a; ram dangte kan el phakna kawng khat chu zirna hi a ni. Sap missionary-ten Chanchintha leh lehkhathiamna min rawn pe a, chu chu kan ramin nasa takin kan lo chhawr tawh thin a; tun hunah pawh hian kan ram hian finna leh remhriatna a mamawh zual zel a ni” a ti. Zirlaite leh zirtirtute chu kan ram tana thahnemngai taka zirna kawnga inpe thar tura fuihin, “Lehkhathiam nihna hi ram tana mi tangkai ni tura kan inthuamna pawimawh ber pakhat a ni a; chuvang chuan zirna hmang hian keimahni leh kan ram hi kan chawisang thei tih I theihnghilh loving u” a ti. Minister chuan Govt. T. Romana College kawta lirthei dah khap a nih avanga an harsatna tawh mek chu tharum ni lova dawhkan kila sawifel theih a duh thu a sawi rualin, amah pawhin theih tawp lo chhuahpui a tiam a ni.

He inkhawmah hian Minister chuan Social, Economic & Political History of Mizoram tih lehkhabu chu a tlangzarh a; he lehkhabu hi seminar paper phuahkhawm a ni. College Weeek chhunga inelna peng hrang hranga tithate hnenah lawmmawn sem a ni a; a pumpuia chhutin Green House chu pakhatna an ni. Kumina graduate tharte hnenah lawmpuina leh chawimawina hlan an ni a; chawhnu inkhawmah intihhlimna hun buatsaih a ni a; college Mister leh Miss result puan a ni bawk.