Nimin 28/4/2016 khan Govt.Mizo H/S chuan an School naupang Matric Pass tharte lawm sakna hun an school tualzawlah an nei.

He hun hi bialtu MLA Pu Lalthanzara,Pu Vanneihtluanga,Zarkawt leh Chanmari Local council member ten an hmanpui a, Pu Vanneihtluanga’n Pass tharte lawmpuina leh fuihna thuchah sawiin Matric pass hian lehkha zir tak tak tlak kan niin zirna lamah kan mit a keu ve tan chauh tihna ani a,in hma lam hunah chuan nangmahni in pawimawh dawna tihluihna nilo induhna ngeia lehkha in zir dawn avangin mahni in control theih a pawimawh dawn hle ani ati.

Pu Lalthanzara pawhin thu sawiin Sap Missionary ten kan ram tana rohlu min hnutchhiah pawimawh tak pakhat chu Zirna in min siamsak hi ani a,tun thlenga Mizorama High school hmasa ber Govt.Mizo H/S tluangtaka a la kal zel thei hi a lawmawmin he school hi amah ngei pawh akal tawhna thin anih avang leh Sawrkar School tihmingthatu a nih avangin Headmaster,Staff te leh thawktu te zawng zawng chungah lawmthu a sawi ani.Pass te alawmpui rualin fail te pawh beidawng mailoa taima zawka zir zel turin a duha,amah pawhin beidawngloa a beih hram hram na avanga tun dinhmun thlengthei anih thu a sawi.

Headmaster Pu Lalrammawia chuan he hun hmanpui tura lo kal zawng zawng te chungah lawmthu a sawi a,he School hian Zirna mai bakah naupangte puitlinna kawnga zirtirna tha pek te leh mahni ke a dingchhuak thei tura chher hriam hi a tum ber anih thu sawiin chutiang tura theihtawp an chhuah thin thu a sawi bawk.

2016 Matric Result-

Appeared-239,

Pass-197,

Distinction-20,

First Div- 46,

IInd Div-74,

III Div-57,

Pass Percentage-82.5.