Ni 11.8.2015 chawhma dar 11:00 khan New Education Policy siam tura sorkar laipui Ministry of Human Resource Development hmaa lak mekna zuiin Higher & Technical Education Department, Mizoram chuan New Education Policy siam mekah Grass root Level Consultation chungchanga inrawnkhawmna I& PR Conference hall- ah an nei a. He programme hi Higher & Technical Education Commissioner Pu K. Lal Nghinglova, kaihhruaina hnuaiah neih a ni. He inrawnkhawmnaah hian Higher & Technical Education hnuaia Officials-te, Mizoram chhung College hrang hrang Principals, Mizoram University hnuaia thawkte leh State Information Officer NIC leh Chief Information Officer, Information Communication Technology te an tel a ni. Higher Education kaihhnawih thupui 20 te sawihona neih a nih bakah, Higher Education hmasawnna tur hrang hrangte sawiho a ni a. District Level leh State Level Consultation neih dan turte rel a ni.
New Education Policy chungchang : Kum 1986 khan Sorkar laipuiin National Policy on Education mumal tak a duang chhuak a, kum 1992 khan engemaw chen tih danglam anih hnuah vawiin thlengin hman zui a ni a. Hun lokal zelah thil tam tak a lo inthlak dang lam tak avangin Education Policy thar duan chhuah a lo tul ta a. Mipuite hnenah zirna kalphung tha, thil thar hmuh chhuak tura zir bingna (Innovation & Research)kalphung tha te bakah India ram hi knowledge super power (zirna, hriatna leh thiamna kawnga mite chung en) a lo nih ngei theihna atan zirlaite hnenah skill leh knowledge an mamawh ang pek a tul a. Science and technology leh zirna in leh thilsiamna hmuna thawktu indaihlohna phuhruk anih ngei theihna turin New Education Policy tha tak duang tura hma lak mek a ni.
New Education Policy siam tur hian kawng 3-in hma lak mek a ni a:
1) On line Consultation (Internet hmanga sawihona leh ngaihdan thawh theihna) MyGov.in hmangin. Hei hi 26th January to 30th April 2015 chhung a ni.
2) Thematic Consultation - Education Field a mithiam (expert) hrang hrangte leh Ministry of human resource development a thawktute inrawn khawmna leh
3) Grass root level consultation (a hnuai hnung ber atanga ngaihdan thawh theihna): State Sorkar hnuaiah chuan a hnuaihung ber thingtlang khua atanga tangin, Block, District Level leh State Level thlengin) inrawnkhawmna hi neih tur a ni.
Tunhma ah khan a chung lam atang a thuai (Top down) in Education Policy kha duan thin a ni a. Tun tum ah hi chuan tunhmaa la tih ngai loh angin hnuai lam atanga tan chhoh ‘bottom up’ approach, mi a tam thei ang berin an ngaihdan thawh theihna leh tel theina tur (Cooperative federalism spirit) zuia hma lak a ni.
Thupui (Theme): New Education Policy hnuaiah hian thupui (Theme) thlan bik 33 a awm a. School Education hnuaiah thupui 13 awmin Higher Education hnuaiah theme 20 a awm thung a ni. Heng level hrang hranga sawihona leh thuchhuakte hi MyGov.in ah National Informatics Centre a State Information Officer-te nen tangrualin upload tur a ni. State hrang hrang-ah hetianga hmalak a nih hnuah Zonal meeting (zone 6-ah) a awm leh ang a, chumi hnuah National Level Meeting awm leh in kumin 2015 December thlaah chuan New Education Poiicy duan hi zawh fel theih beisei a ni.
