Nimin leh vawiin khan UD&PA hnuaia NLUP 3rd & 4th phases beneficiaries-te hnenah tanpuina 1st intallment tanpuina sem a ni.
Vawiin khan Thuampui YMA Hall-ah Aizawl East- I huamchhunga beneficiaries mi 99 te hnenah tanpuina Rs. 42,70,000 sem a ni a, he hun hi bialtu MLA, Assembly Dy. Speaker ni bawk, Pu R. Lalrinawma’n a hmanpui.
Bialtu MLA Pu R. Lalrinawma chuan, hmun tam takah hmasawnna duh vangin tharum hmangin an duh an nawr a, buaina nasa tak a chhuah phah thin thu sawiin Mizote chu chutiang ngai lova sawrkarin mipuite tana ruahmanna tha tak siama bul atanpui thin chu vanneihthlak, a ti.
Pu R. Lalrinawma chuan, duhsaktu nei tha leh thil ti thei deuh ta tura kan ngaih thin kha tunah chuan duhsaktu nei lo leh thil ti thei loa inngai te kutah a lo awm ta hi thil lawmawm tak a ni, a ti a, Sawrkar hnathawk tam takin NLUP vanga harsatna thleng thin tih thu dik lo mi mawl zawkte hnenah sawi an ching chu pawi a tih thu sawiin, NLUP avang hian department tam takin hmasawnna hna nasa takin an thawh theih phah a, a thente phei chu NLUP hmangin kan awi nung leh hial a ni,” a ti a, Mizo mipuite leh NLUP dawngtute chu a chhuanchhe zawnga thil la lo va, mahni tuh rah theuh kan seng dawn avangin NLUP dawngtute chu hlawhtling tlaka thawk a, huaisen turin ka duh che u a ni, a ti.
Nimin ni 12.8.2015 khan Thakthing Zawlbuk-ah Aizawl West - I huamchhunga beneficiaries mi 218 tan Rs. 84,40,000 sem a ni a, Aizawl South - II huam chhunga beneficiaries mi 183 tan Rs. 82,70,000 leh Aizawl West -II huam chunga beneficiaries mi 196 tan Rs. 68,10,000 te hnenah bialtu MLA, Col. ZS Zuala’n tanpuina a sem bawk.
Nimin vek khan Dinthar YMA Hall-ah Aizawl West - I huamchhunga beneficiaries mi 134 tan Rs. 47,70,000 leh Aizawl West - II beneficiaries mi 206 tan tanpuina Rs. 96,10,000 sem a ni bawk.
Aizawl North - I, Aizawl North - II, Aizawl North - III leh Aizawl East - II huamchhungah pawh 1st Installment sem hna hi thawh chhunzawm thuai a ni ang. UD&PA hnuaiah hian trade 10 awmin, heng zingah trade pahnih (DTP leh photo) te tan 1st Installment sum Rs. 100,000 pek kim nghal a ni a, a dang zawng hi 1st Installment atan Rs. 20,000 ruahman a ni.
