513/2023-2024

Aizawl, 19th May, 2023 : Vawiin khan Mizoram Samagra Shiksha leh State Level Sports Association hrang hrangte ṭangkawpin an buatsaih 'Grassroot Sports Development Programme State Level Competition 2023' kharna Ramhlun Indoor stadium-ah neih a ni a, School Education Minister Pu Lalchhandama Ralte chu khuallian niin he hun hi a hmanpui.

Education Minister chuan thusawiin zirlai infiammi kal khawmte chu an talent neih țha tak tak te peipung a, khawvel huapa mawi taka phochhuak turin a chah a. Mahni inthunun a, invawng chunga inbuatsaih zel turin a fuih. Minister chuan Mizoram hian infiammi chhuanawm tak tak a nei țhin a, India leh khawvel huapah lawmman te pawh an lo la țhin a, heng infiammi chhuanawm bikte hi Mizoram sorkarin chawimawina țha tak tak a lo hlan tawh a, tun hnaiah pawh rit chawi chak Jeremy Lalrinnunga chu an chenna Ainawn vengah in hmun pek a ni a ti. Mizoram sorkar hian sports hi industry-ah a puang tawh a, sports hi eizawnna tlak tak takah siam a tum a ni a ti. Minister chuan Samagra Shiksha hnuaia Grassroot Sports Development Programme centre neih sa 40 bakah kuminah centre 6 hawn a ni leh dawn tih sawiin zirlaite chu an vanneihna hmang țangkaia inchher hriam turin a fuih a ni. 

Ni thum chhung awh State Level Competition thawh khatna Aizawl-a neihah hian infiamna chi thum - Boxing, Badminton leh Weighlifting hmangin District hrang hrang atanga infiam mi an intihsiak a, zirlai 144, official 36 an vaiin 180 an kalkhawm a ni.

Boxing-ah team champion Champhai District-in Gold-7, Silver-2, Bronze-5 an la a, runner's up Lawngtlai Dist-in Gold-5, Silver-6, Bronze-1 an la.

Badminton-ah Lawngtlai district an champion a, Gold-2 leh Silver-1 an la a, runner's up Siaha-in Gold-1 leh Silver 1 an la bawk.

Weightlifting girls-ah Aizawl District-in gold-3, silver-1 lain team champion an ni a, runner's up Champhai District-in Gold-1, silver-3, bronze-2 an la. Boys-ah Champhai in Gold-2, silver-1, bronze-3 an la.

Grassroots Sport Development Programme atan hian Samagra Shiksha Mizoram leh Sports Association panga  Mizoram Boxing Association, Mizoram Badminton Association, Mizoram Football Association, Mizoram Weight-lifting Association leh Hockey Mizoram te nen  thawhhona thuthlung  ziah a ni a. Samagra Shiksha Mizoram chuan Grassroots Level Sport Development Programme (GSDP) hnuaiah  Mizoram hmun hrang hrangah Centre 40 a din a, sawrkar sikul a kal naupang kum 6 -14 inkar ten sports discipline hrang hrangah training an nei ṭhin a. Training an neih ṭhin atanga an thlen chin enfiahna leh an hmasawn dan  tehna pakhat atan  state pum huapin intihsiakna hi neih a ni.

Attachment

  • Loading attachment...