Vawiin chawhma khan PHED Secretary Pu V. Lalremthanga, IAS leh PHE Engineer-in-Chief Er. Valbuanga te chuan Lunglei leh a chhehvel chawmtu tui lakna Greater Lunglei Water Supply Scheme bunna Tlawng lui chu a hmunah an tlawh a, tui lak kawnga harsatna hrang hrang an tawhte enfiahin theihtawp chhuaha heng harsatna awmte sutkian an tum thu an sawi.

Pu V. Lalremtluanga chuan Lunglei khawpui leh a chhehvel chawmtu Tlawng lui chuan thal laia tui kham khawp a pek theih tawh loh avangin Mat lui atanga tui lakna tur chak zawka hmalak a nih tur thu a sawi.

Lungleia PHE Department hotute chuan an harsatna lo thlenin tun dinhmunah tui pump chhuahna pipe lian a that tawh loh avangin tui pump hun chhung darkar sawm zet a a rei phah thu te an sawi a, siam that a nih chuan diesel leh power ah sum sen a tlem zawk tur thu an sawi. Tui lakna ber Tlawng lui in thal laiin khawpui mamawh khawp tui a pek theih tawh loh avangin Mat lui atanga tui lakna tur Thualthu khua atanga uluk taka en a nih tawh thu an sawi bawk.

Lunglei khawpuiah PHE Department hnuaiah tui connection 11764-a awm mek a, tui bill atangin thla tin cheng nuai 23 lalut in, nitin in mi pakhat tan tui litre 40 ang zel an pe chhuak a ni.