Green Mizoram Day 2012 chu tukin zing khan Chief Minister Pu Lal Thanhawla chuan 23 Sector Assam Rifles Complex, Khatla a Mizoram Hall-a inkhawm buatsaih ah a hawng.

Hawnna thuchah a sawiah Chief Minister chuan kan ramngaw, thing leh mau te hi mihringte mamawh, boruak tha oxygen siamtu anih avangin a humhalh hi kan zavaia mawhphurhna a ni a ti a. Kum 1998 a bul tan anih khan mithenkhatin hun leh sum khawhralna mai mai ani an tih thin chu sawichhuakin, tunah chuan a hlawhtlinna kan hmu chho ta zel a a lawmawm hle a ni a ti a, hei hi department leh mipuite tan lakna vang a ni a ti.

Chief Minister chuan Mizote hian ramngaw pawimawhna kan hriat tawk thin loh avangin kan tichereu nasa a, hetianga kan kal chhoh reng chuan kan ram hi thlalerah kan chan tir mai a hlauhawm a ni a ti a. Chuvangin kan fimkhura, tan kan lak hle angai a ni a ti. Sorkar pawhin NLUP hmangin kan thing leh mau te humhalh hna a kalpui chho mek a ni a ti bawk.

Inkhawm Chairman Pu H.Rohluna, Environment &Forest Minister chuan thing kan phunte hi 100% hlawhtlinglo mahse, a tlangpuiin a tha thawkhat hle a ni a ti a. Kuminah thingtiak 2,86,000 phun tum anih thu a sawi bawk.

Brig SP Rawat, DIG 23 Sector Assam Rifles chuan Green Mizoram Day hawnna Assam Rifles in kan thleng chu a lawmawm hle a ni a ti a. Assam Rifles hian thing phun hi nasa taka an lo kalpui thin thu a sawi bawk a ni.

Dr.S.S. Garbyal, Principal Secretary & Member Secretary, State Level Committee on Green Mizoram chuan report pein, AR Complex ah hian thingtiak 1000 phun tur a ni a ti a. Naktuk YMA Day denchhenin YMA leh NGO te hnenah thingtiak phun sem ani bawk ang a ti a. Mimal angin thingtiak phun hi Rs.2500/- chawiin a sponsor theih thu a sawi a. Hei hi Environment & Forest Department in uluk taka kum 3 chhung a enkawl tur thu a saw bawk a ni.

Kumin Green Mizoram Day thupui ah ‘Thing phun ila, Zoram nuam i siam ang u’ tih chu thlan a ni a, theme song video ‘Green Green Mizoram’ tih chu Chief Minister hian a tlangzarh nghal bawk a. Kangmei chhuak thei veng tha te hnenah, Fire Prevention Award 2012 lawmman Chief Minister hian sem bawkin, District ti tha ber Aizawl District in Rs.20,000/- leh trophy, 2nd prize Serchhip leh Saiha district - Rs.15,000/-leh certificate ve ve, leh 3rd na Lunglei in Rs.10,000/- leh certificate an dawng bawk a ni. District tin chhunga khaw ti tha bik 3 hnenah lawmman pek an ni bawk.

Hawnna inkhawm banah thingtiak phun, ceremonial tree planting neih nghal niin,thing tiak chi hrang hrang 28 phun tur a ni. Chief Minister hian Tlaizawng tiak a phun a, a nupui Pi Lal Riliani’n Mizoram State Tree Herhse tiak a phun bawk a ni. Ministers, Parliamentary Secretaries, MLA, Chief Secretary, Addl Chief Secretary leh official dang ten thingtiak an phun bawk a ni.