Vawiin khan Green Mizoram Day 2012 chu DC Complex, Mamit ah Pu Rodney L. Ralte IAS District Bawrhsap, Chairman District Level Committee on Green Mizoram ni bawk chuan khuallian niin a hmanpui.

He Green Mizoram Day 2012 a thingphun runpui hawnna Pu H. Vanlalhlua President Sub Hqrs YMA kaihhruaiah hian District Bawrhsap chuan thusawiin thing leh mau kan rama a lo chereu nasa ta lutuk hi a pawi hle a, chu mi pawi tih nachang hria a sawrkarin nasa taka tan a la hi a lawmawm hle a ni a ti a. Vawiin ni a thingphun tura thawkchhuak sawrkar hnathawkte pawh sawrkar duh dan anga hma la tur leh thing phun ringawta duh tawk mai lovin a venhim zuina kawngah pawh mawh kan phur a ni a ti a. Khuallian chuan kumina kan thingphunte hi a enkawlzui tha te hnenah kumtharah lawmman buatsaih tum a nih thu a sawi bawk.

Pu Lallianzuala DFO Mamit in Report pe-in Green Mizoram Day hi vawi 14 kan hmanna a nih thu leh Mamit District ah hian thingtiak 35533 lai phun a ni tawh a ni a ti a. Tun tum ah hian thingtiak phun tur 1073 sem chhuah niin heng zinga 391 hi vawiin a hnatlanga thawk chhuak te phun a ni. Vawiin thingphun runpui hawnna ah hian District Bawrhsap leh Tlawmngai Pawl hruaituten DC Complex-a Mahatma Gandhi Lim bulah thingtiak an phun a ni, thingtiak te hi Mamit leh Bairabi inkar kawngpui dungah phun niin hung nghal vek a ni bawk.

Thingphun hawnna inkhawm ah hian kalkhawm ten ramngaw humhalh turin thu an tiam bawk.

Vawiin Green Mizoram Day 2012 hian kumin a kangmei ven chungchanga hnathawk tha khua 1. Dampui, 2. Rawpuichhip leh 3. Nghalchawm te hnenah Certificate leh pawisa fai hlan an ni a, ramkang ven pawimawh zia zirtirna pe tha chanchin bu thlanchhuah te, 1) Mamit Times, 2) Mamit Post 3) Lentupui te hnenah Certificate leh pawisa fai hlan an ni bawk a. Lawmman te hi District Bawrhsap in a hlan a ni.

Vawiin Green Mizoram Day a thingphun tur hian Mamit khawpui chhunga sawrkar hnathawk tlawmngai pawl hruaitute leh thutharthehdarh tute mi 517 an thawkchhuak a, zirna in hrang hrang a zirtirtu leh zirlai ten an mahni compound chhungah vawiin hian thing an phun bawk a ni.