Vawiin chawhnu dar 2-ah Governing Body Meeting, Mizoram State Tobacco Control Society, (MSTCS) chu an Chairman thar Pi Esther Lalruatkimi, IRS, Secretary, Health & Family Welfare Office Chamber-ah an thukhawm a. Nikum lam rorel bawhzuiin, hma lak dan te an thlir hova.
Hma lak leh zel dan turte hetiangin an sawiho. 1. Mizorama Meizuk khapna dan kalpui mek ngun taka thlirin, Civil Hospital leh Private Hospital-a meizu lo tura hmalakna chu a hlawhtling hle tawhin a lang a, lawmawm an ti hle a ni. Amaherawhchu, Damdawi Ina thawktu Doctor leh mi dangte ngei pawh meizuk ruk ching te, Damlo kan tute zingah meizuk sim thei lo thahnem tak an la awm avangin, thuneitute hnenah khauh taka Meizuk khapna dan hi kalpui tura ngenna thawn leh nise; Toilet leh bang kil deuhva meizuk ruk avanga rimchhia te tireh tura tan la tura ngen leh nise, tih a ni.
2. Nikum July ni khat atanga May 2012 thlenga Vaihlo leh a kaihhnawih that lohzia beihna kawng hmalakna thlir ho a ni a. Workshop vawi 32, Campaign-a chhuah vawi 37, Meizuk dova vah chhuah- vawi 51, Meeting leh Talk Show buatsaih vawi 32 a ni a; Thla 10 chhungin vawi 152 programme hman a ni a, lawmawm an ti hle.
3. Meizuk dan tlakhniam dan hetiang a ni a, hmasawnna a tha hle: 2009-a Mizorama puipunnaa meizuk dan record chu 61.65% a ni a; 2011-ah chuan 18.18%-in a tla hniam a, Mizoramin nasa takin helam hma kan sawn avangin lawmawm an ti hle a ni. Hetih laiin Lawngtlai District-ah chuan 2009 aiin 2011-ah hmasawnna a awm lova; tan lak zual a ngai hle a ni.
He Meeting hi Chairman thar Pi Esther Lalruatkimin hruainaah, Dr Jane R.Ralte in Committee a kaihruai tha hle a; Pi Lal Riliani, President-in Health Secretary thar lawmna thu a sawi bawk a ni.
