“Green Mizoram Day, 2012” chu Mizoram chhung District hrang hrang te rualin vawiin chawhma dar 10 : 00 khan District Level Committee on Green Mizoram, Saiha te huaihawt in Pu Solai Azyu, A.C.F., M.A.D.C., kaihhruaina hnuai-ah Saiha-ah pawh hman ani.

He Ni hmanna inkhawm tawi Circuit House Saiha-a neih ah hian Pu C.Zohupa, Principal, Government Saiha College chuan hunserh a hmanga Pu Vanlalngena, Additional D.C., Saiha chuan khuallian niin a hmanpui ani. Thu sawiin khuallian chuan “Thing phun ila Zoramnuam i siam ang u” tih thupui hmanga Green Mizoram Day hmang tura kalkhawm zawng zawng te chu Thing phunte a nun that theih nana hmalak pui turin a sawm a, Pathian in thil engkim awmze nei veka a siam thu leh boruak min pek hi mihring ten kawng hrang hrang a kan tihchhiat thu a sawi a, he boruak chhe mek siam tha leh tur chuan Thing, Hnim leh Mau te atam thei ang ber kan phun a ngai ani a ti a, thing leh mau te kan tihpun zel hi mihring te leh nungcha te kan dam khawchhuah theihna tur awm chhun ani, ati bawk. Pu F.Lawmkima, E.M. Revenue, M.A.D.C.pawhin thu sawiin kan pi leh pu te Lo neih dan in kan ram nasa taka a tihchhiat thu sawiin kan ram chhe tawh siam that leh nan Thing phun chauh nilovin a enkawl zui a pawimawh thu a sawi a, Pathian in kan ram min siamsak hi kan tu leh fa lo kal leh zel turte tan chenna tlakah i siam ang u, ati bawk.

Green Mizoram Day Ni hian Saiha khawpui chhung hmun hrang hrang thlanchhuah bik hmun 8 ah te thingphun hnatlang neih ani a, department hrang hrang a thawk te leh School naupang ten hnatlang hi neiin heng thingphun turte hi Thing hrang hrang tiak M.A.D.C. a Forest Department ten an lakkhawm chu a thlawna sem chhuah ani. Green Mizoram Day puala inkhawm tawi neih hi Pu K.Sachho, S.D.O., P.H.E.in lawmthu sawina-a a tihtawp hnu ah Thingphun hnatlang hi neihzui nghal a ni.