US Consul General, Kolkata atanga lokal Pu Dean R. Thompson chuan nimin June ni 13 khan Mizoram University a tlawh.

Consul General hian Mizoram University Vice Chancellor Prof.R.Lalthantluanga office-ah lengin inkawmna an neih zawh hnuah Mizoram University zirlai te nen New Administrative Conference Hall-ah inkawmhona hun an hmang chhunzawm a ni.

Pu Dean R.Thompson chuan U.S.A leh India inkungkaihna chu ngaihhlut zawng thuhmun an neih avang a ni tih sawiin heng ram pahnih te inzawmna chu ban pawimawh tak tak pangaah a innghat a. Chungte chu chetlakna hrang hranga thawhdunna (Strategic Cooperation); thahrui leh sik leh sa inthlakthleng (Energy and Climate Change); zirnaa hmasawnna (Education and Development); sum leh pai leh insumdawntawnna leh loneih (Economics, Trade and Agriculture) leh Science, Technology, Health and Innovation te hi a ni, a ti.

Consul General chuan India hmar chhak State-te chu an awmhmun pawimawhna (geographical importance) avangin U.S-India inkungkaihna kawngah kori a tu hle dawn tih tun hnaia US Secretary of State Pi Hillary Clinton-in India a tlawh tum pawh khan chiang takin a sawilang a, USA chuan New Silk Road siam tur hi a phurpui hle a, khawchhak ramri a awm an nih avangin hmarchhak State te hian kawngro thui tak an su dawn a ni, a ti bawk. Zirna hi ram pahnih inkungkaihna lungphum pawimawh tak niin tun dinhmunah India khua leh tui zirlai nuai khat zetin U.S ah lehkha an zir mek a, American khua leh tui mi 2300 ten India ramah lehkha an zir ve mek bawk a, US zirlai tam zawkin India rama lehkha an zir theih nan Passport to India programme kalpui mek a ni, a ti bawk. Obama-Singh 21st Century Knowledge Initiative chuan Dollar maktaduai 10 zet University inthlunzawmna, zirtirtute tuaihriamna, zirtirtu te bakah thawktu dang te leh zirlai te intlawhtawnna (exchange visit) programme atan dah a nih thu Consul General hian a tarlang bawk.

U.S leh India sorkar hmalaknain “EducationUSA Centre” hi India ram hmun hrang hrangah dah a ni a, U.S a lehkha zir duh tan heng Centre-ah te hian thu chiang zawk zawhfiah theih reng a ni a, mimal tan pawh counselling a awm reng bawk. Hrechiang duh tan “facebook.com/Kolkata.consulate” leh twitter “@USAandKolkata” ah te entheih a ni.