Vawiin ni 11 June, 2013 khan Green Mizoram Day chu Mamit a uar taka hman a ni a. Hawnna inkhawm, Charkawn Mamit-a buatsaih Pu H. Vanlalhlua President Sub Hqrs YMA kaihhruaiah Pu V Lalremthanga IAS District Bawrhsap, District Level Green Mizoram Committee chairman ni bawk chuan khuallian niin hawnna hun a hmang a.

Thusawiin khuallian chuan Mizoram ah 122 sq km chauh ngaw-in a khuh tawh thu sawiin hei hi 1 percent pawh a tling tawh lova, hetiang zela kan kal chuan thangtharte tan khawsak ngaihna a awm dawn lo a ni tiin hemi kawngah hian theihtawp kan chhuah a hun tawh takzet a ni, a ti a.

Bawrhsap chuan thingtiak phun tam ringawt hi a ropui ber lo a ni tiin a phun nun hi ngaihpawimawh zawk tur a ni a ti a, hemi kawngah hian uluk takin kan thing phunte enzui turin District Level Committee chuan a endik dan Proforma siamin hma a la dawn a ni, a ti bawk.

Pu Lallianzuala DFO, Member Secretary chuan kan hmalak tawh dan leh tun tuma hma kan lak dan turte report pe-in Mamit District-ah hian Green Mizoram kan hman tan atangin thing tiak 43036 phun a nih tawh thu a sawi bawk.

He Green Mizoram Day 2013 hawnna hunah hian District chhunga Ram kang vengtha khaw pathum 1st Rawpuichhip Citation leh Rs 3000/- 2nd-na Joint V.C Kawrthah Citation leh Rs 2000/- leh Lengpui Citation leh Rs 1000/- hlan an ni a. Hei bakah hian kangmei ven kawnga chanchinbu titha pathum 1st Mamit Times 2nd- Zotlanglentu 3rd- Mamt Post te hnenah Citation leh pawisa fai hlan an ni bawk. tin nikum lama thingtiak phun nung tha Agency pahnih Mamit Pastor Bial TKP 45 phuna 44 phun nung leh SSA(BRC) thingtiak 28 phun a 25 phun nungte hnenah lawmman hlan an ni bawk.

District Level Committee hian District Bawrhsap hnenah thingtiak mawi tak an hlan a ni.

Vawiin Green Mizoram Day 2013 hmanna-ah hian Mamit leh Bairabi inkar, Bualzau khaw thlengin thingtiak 670 phunin nikum lama phun sa thingtiak 250 thawmthat a ni a, Mamit leh Bairabi inkar-a khaw awm, Suarhliap in thingtiak 100, Vawngawnzo in thingtiak 50 leh Damdiai in thingtiak 50 vawiin ni hian an phun bawk a ni.

Vawiin a thingtiak phunte hi Agency hrang hrang 48 niin mi 697 an thawk chhuak a ni.

District Level Committee in a lo rel angin District chhunga SDO (Civil) leh Block Hqrs pathumah te thingphun ve tura a beisei an nih angin vawiin hian SDO(Civil) Kawrthah-ah Green Mizoram Day hi hman a ni bawk.