Vawiin khan Mizoram pumah ‘Green Mizoram Day’ vawi 15-na hman a ni a, a hawnna inkhawm chu tukin zing dar 7:30 khan ICFAI University Campus, Durtlang ‘N’ah neih a ni. Green Mizoram Day hawnnaah hian Home Minister Pu R.Lalzirliana chu Khuallian niin Environment & Forests Minister Pu H.Rohluna chu Khual Zahawm a ni a. Kumin thupui atan ‘Thing phun la, I ram chhan rawh’ tih hman a ni. 

Hawnna inkhawm PCCF leh Member Secretary, SLCGM Pu J. L. Singh kaihruaiaah hian Home Minister Pu R. Lalzirliana chuan hun hmasa lamah a hriat theih leh a tawnhriat chinah pawh Aizawl leh a chhehvelah ramsa an la tam thusawiin engemaw tih lai atang khan ramngaw leh ngawpui suat darhin a awm ta khan nungcha te a ti rem a ni, a ti a. Ramngaw kan tih chereu nasat avanga boruak danglam chuan Mizoram, a bik takin Aizawl leh a chhehvel, chu phairam ang maiin a ti lum tawh a, thlaler ramro leh tui hna vanna hmunah Mizoram chu kan siam mai ang tih a hlauhthawn thu a sawi. Keini a rama chengte hi kan pawimawh a, beidawng lo a, hma kan lak chho zel chuan ramngaw tha kan la siam leh thei ka beisei a ni a ti a. Mitin ten thingphun uar a, thing leh mau chu duat taka enkawl a tul a tiin hemi lamah rilru seng turin mipui a chah bawk a ni.

Home Minister Pu R Lalzirliana hian Pu M. Sawmliana, Forest Ranger lehkhabu ziah ‘Book of Mizoram Plants’ tih chu a tlangzarh nghal a. He lehkhabu ah hian Mizorama thing leh mau chi hrang hrang, ramsa leh sava te leh nungcha dangte hming bakah an chanchin leh thlalak thahnem tak a awm bawk a.

Environment & Forests Minister Pu H. Rohluna chuan Green Mizoram Day hman thin hian mipuite chu Environment humhalh kawngah ti thangharh thei se tih a duhthusam thu a sawi a. Green Mizoram Day programme-in a tum ber chu - Mipui te hnenah ramngaw leh a pawimawhna hrilhhriat leh kan chhehvel, a bik takin tlangram atana ramngaw tangkaina zir leh pawimawh zia hrilhhriat te; thilsiam zawng zawngte chenna inbuk tawk (ecological balance) nei tura ramsa leh thing leh mau awmsa vawnhim leh humhalh te leh tui thianghlim in tur hnianghnar kan neih theihna tura tuihna tihpun te a ni, a ti. Kan chenna khawvel hi kan pi leh pu te’n min rochun tir mai a ni lova, kan tu leh fate ta tur kan lo hmang puk a ni tih hi kan hriatthiam ka duh tak zet a ni tiin NLUP Programme hlawhtling taka kalchhoh pui mek hian ramngaw leh a chhunga cheng ramsa te tan malsawmna a thlen a, a chhawrtu tur te chu keini mihringte bawk hi kan ni, a ti bawk.

Pu H. Rohluna hian he hunah kalkhawm zawng zawng te leh Mizorama he Ni puala thingphun tute chu thing phun uar zel tura sawmin, ramsa leh sava tlan chi te pawh a remchang apiangah phun a, thing phunsa te enkawl that a, venghim a, an puitling ngei theih nan theihtawp chhuah theuh turin a chah a ni. Thingphun hi Mizoram tana thil tha kan tih theih pawimawh tak a nih tih hre reng tura fuihin, khawvel hi kan tu leh fate tana chenna tlaka kan hnutchhiah theih dan awmchhun chu thingphun hi ani, a ti bawk.

He programme hi Parliamentary Secretary to Chief Minister leh Chairman, Sub-Committee on Green Mizoram ni bawk Pu Lal Thanzara; Chairman, Mizoram State KVI Board Pu K. Lianzuala leh Chief Secretary Pi L. Tochhong ten an hmanpui bawk a. Department hrang hranga hotulute leh Environment & Forests Department officials thahnem tak an tel bawk. ICFAI University Mizoram, Pro Vice Chancellor Pu P. Rohmingthanga, IAS (Rtd) chuan lawmthu sawiin vawiina thingphun zawng zawngte chu ICFAI University chuan duat taka an enkawl zui tur thu a sawi. ICFAI University Mizoram panna kawng JNNURM kaltlanga tha tak siam a ni chu thuneitu hnenah lawmthu a hrilhin ICFAI University Mizoram chuan zirlai naupangten Mizoram chhung ngei a thiamna bik (skill education) zirna an neih theih nana an hmalak dan a tarlang.

Green Mizoram Day 2013 pualin Home Minister, Environment & Forests Minister leh mi pawimawh dang ten ICFAI University Campus chhungah thing an phun vek a, a vaiin ICFAI Campus-ah hian vawiin khan thing tiak 1000 phun a ni. Mizoram Florists’ Association chuan he Ni pual hian Lengpui Airport compound chhunga Herhse kung 200 leh thing tiak dang 50 an phun a ni.

January 2009-a Satellite thlalaka landan atang chuan Mizoram pumpuiah ram ngaw (total forest cover) chu 19,117 sq. km. anga chhut a ni a; 134 sq. km chu very dense forest a ni a; 6,086 sq. km. chu moderately dense forest leh 12,897 sq. km. chu open forest a ni. Mizorama ramngaw pumpuia carbon stock chu 97,928,000 tonne anga chhut a ni a, chu chu hectare khat a 52.41 tonnes a ni.