Mizoram hmun dangte rualin “Green Mizoram Day, 2013 chu Saiha-ah pawh “Saiha District Green Mizoram Committee” te bultumin hlawhtling taka hman a ni. He Green Mizoram Day puala inkhawm tawi chu chawhma dar 11 : 00 khan Circuit House Saiha-ah Pu Solai Azyu, A.C.F., M.A.D.C. Saiha kaihhruaina in neih a ni a. Pu N.Chakhai, Additional Deputy Commissioner chuan khuallian niin a hmanpui.

Thu sawiin khuallian chuan kan ram ngaw chereu zel te ven nan leh mihring ten kan mamawh em em boruak thianghlim kan hmuh zel theih nan Thingphun hi a pawimawh takzet a ni, a ti a. Green Mizoram Committee ten Thingphun Ni “Green Mizoram Day” a ruahman chu lawmawm a tih thu leh he ‘Ni’ hi mitin ten Thingphun nan hmang theuh turin a chah a, June thla chhunga piang zawng zawng te phei chuan mahni Piancham lawm nan kumtin Thing pakhat theuh tal phun nun tum turin a ngen bawk. Thing hi phun ringawt lova kan phun nun tawh sate enkawl zui a pawimawh thu sawiin mitin te Thing phun uar lehzual theuh tur leh a enkawl zui lama theih tawp chhuaha tan la theuh turin a chah a ni. He “Green Mizoram Day” function neihna ah hian kumin “Fire Prevention Week, 2013” denchhana Essay inziahsiakna-a tithate hnenah lawmman sem a ni a, he Essay inziahsiakna ah hian pakhatna Matt C.Mara chuan lawmman tangkafai Rs 2000/- leh Citation a dawnga pahnihna Hmaoko Hlychho, Editor, Maraland Daily Newspaper chuan lawmman tangkai fai Rs 1500/ leh Citation a dawnga lawmman pathumna dawngtu J.B.Khaisia chuan Tangkafai Rs 1000/- leh Citation a dawng bawk a ni. Heng lawmman te hi Khuallian Pu N.Chakhai, Additional Deputy Commissioner, Saiha District, Saiha chuan a sem a ni.

He Green Mizoram Day ah hian M.A.D.C.-a Environment & Forest Department te chuan Saiha khawpui chhunga phun turin Thing tiak chi hrang hrang 1400 chu Sawrkar Department hrang hrang te teh Tlawmngai pawl hrang hrang te hnenah an sem a ni.