Mizoram State Board for wildlife Chairman Pu Lal Thanhawla, Chief Minister kaihhruaina hnuaiah vawiin khan a office conference roomah Mizoram State Board for Wildlife meeting vawi 4-na neih a ni a, thu ngaihtuah tur agenda 6 chhawpchhuahte an sawiho a ni.

Chairman Pu Lal Thanhawla chuan an thurel tur zinga pawimawh ber, Dampa Tiger Reserve chhunga Indo - Bangladesh Border Fencing siam chhunzawm tur chungchang chu Mizoram tan leh rampum himna lam khawih thei anih avangin inhrethiam tawn taka sawiho turin memberte, abikin BSF hotute chu a chah a. Dampa Tiger Reserve chhunga border fencing siam tur hian National Board for Wildlife phalna a ngai hmasa a, he phalna pe tur hian State (Mizoram) Board for Wildlife remtihna ala ngai hmasa a ni. Dampa Tiger Reserve chhunga border fencing siam tur hi 62 kms a thui a ni a, BSF te leh Standing Committee for National Board for Wildlife ten joint survey an neih tawhah Border Outpost (BOP) 7 leh patrolling road siam turin rawtna alo siam tawh a ni. BSF hotute chuan fencing siam tur hian ramsa te dinhmun a tih derthawn loh tur thu leh Bangladesh ram chhunga nena ramsate inkalpawhna tur kawng, corridor hmun 7 ah siamin, pakhat hi 100 metres zela zau tur a ni tih meeting-ah an sawi a. Dampa Tiger Reserve ep lam Bangladesh ram chhungah hel ho camp 27 lai awm nia an hriat thu leh fencing leh BOP siam hi rampum himna atan a pawimawh thu an sawilang bawk a ni.

Meeting agenda dang sawihote chu nikum lama ruahman tawh, Lai Autonomous District Council (LADC) huam chhunga Saikhawthlir Wildlife Sanctuary siam tur chungchanga agriculture atana ram hman theih tur huamlo tura an tih te rel a ni a. Phawngpui National Park leh Ngengpui Wildlife Sanctuary chungchanga LADC kuta hlan chungchangte, Ramsa in mihring nunna a lak leh buh leh thlai leh huan leh lo a tihchhiatte zangnadawmna tihsan leh Aizawl Zoological Park-a luh man leh parking fee tihsan te an sawiho a. Darlawn Forest Division chhunga savawm seh leh rul chuk te hnena zangnadawmna an dil chungchangte an sawiho bawk a ni.

SBWL ah hian E&F Minister Pu H.Rohluna chu Vice Chairman a ni a, Mizoram Chief Wildlife Warden chu Secretary niin member dangte nen an vaiin mi 30 an awm a, vawiin meeting-ah hian 26 an kal a ni.