Vawiin khan District Level Committee on Green Mizoram chu an Chairman Pu Vanlalngaihsaka, Champhai DC hovin DC Conference Hall, Keifangtlang, Champhaiah an thukhawm a, Green Mizoram Day 2018, June ni 11 a lo thleng tur hman dan tur an rel a ni.

He hun  Pu Vanlalngaihsaka kaihruaiah hian  Pu C.Lalbiaka, DFO, Champhai Forest Division, Member  Secretary-in meeting neih chhan leh thurel tur tlangpui sawifiahna a nei a. Thukhawm chuan kumin Green Mizoram Day hmanna programme hmunhma leh thingphunna hmun atan Mualbuhvum chu a thlang a. He mi nia thingphun tur hian Department tin atangin thahnemngai taka thawhchhuah nise a ti a. Planting Agency pakhat tan thing tiak 10 vel theuh phun tura hisap chhin niin, thing tiak phun reng reng chu tha taka hungna siam tum a ni bawk. June ni 11 chawhma dar 11:00 a.m ah a hawnna inkhawm leh Fire Prevention Week puala titha lawmman semna buatsaih a ni ang a. He hun hman zawh hnu hian thing phun hnatlang  neih zui a ni ang.

Vawiin meeting-ah hian Green Mizoram Day hman dan tur programme duan a ni a, heng bakah hian Department thenkhat mahni ram chhunga thingphun duhte tan Forest Department lamah ngaihven theih reng anih thu tarlan a ni a. Ramngaw humhalh leh siam that kawnga thawhhlawk Mimal, Pawl leh Sawrkar Department hnena pek thin Green Mizoram Award guidelines chu zirho a ni bawk.

Kumin hian Mualbuhvuma YMA ram chhungah thing chi hrang hrang 5 vel phun tum niin, tha taka hung leh YMA nena tangkawpa enkawl zui zel tura ruahmanna kalpui a ni a. Nikum lamah khan Hringlang Tlangah Green Mizoram Day pual hian thing 5050 lai phun niin, heng zinga za zela 77.9 chu tha taka nungin enkawl zui a ni. Green Mizoram Programme hi Mizoram sawrkar hmalaknain kum1999 atanga tan a ni a, hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm thin a ni.