Chief Minister Pu Lal Thanhawla chuan vawiin Khan Thingdawl khaw dintu lal Peter Vanhnuaia Sailo hriatrengna lungphun chu a hawng.

Chief Minister chuan khaw dintute hriatrengna lung phun nachang khaw mipuiin a hria chu lawmawm a tih thu a sawi a, hetianga mi hmasa leh mipuite tana sulsutu te nghilh loh nachang hriat hi mi changkang zia a ni a ti.

Ram economy dinhmun ang zelin hmalakna tur policy siam thin a nih thu sawiin, Sawrkar Flagship Programme NLUP tanpuina dawngtu mi rinawm leh taima te chu an dingchhuak mek zel a Sawrkar chuan mi harsa zawk leh chhumchhia te a hre renga heng mi te tanpui tur hian a inpeih reng a chutih laiin Sawrkar ina a thil tum tihlawhtling tur chuan Mipuite Rinawmna leh Taimakna a ngai a ni a ti. Chief Minister chuan Mizoram chu India ramah Gross domestic product (GSDP) pung nasa ber state palite zinga mi a nih thu te, kumin sawrkar kum kal mek a GSDP thanna chu Finance Ministry in double digit ni tura an rin thu te, Mizoram kum khat sum lakluh chawhrual Per Capita Income pawh India Per Capita Income aiin a san zawk thu te a tarlang a. Hengte hi kan ramah remna leh muana a awm avang leh kan ram economy dinhmun siam that nan a sorkarin NLUP leh thalaite hmakhua ngaia an tan eizawnna kawng tha hawng tura NEDP sorkarin a kalpui mek vang a nih tel thu a sawi a. Hmasawn zel tur chuan rinawmna vawng chunga tanrual a pawimawh thu a sawi bawk. Hmasawn tura thawk a, a rah seng tur chuan hrisel a ngaih thu sawiin Chief Minister chuan kalkhawmte chu hriselna ngai pawimawh a, ei leh in uluk a Mizorama chhungkaw tamtak mi ti rum mek tu vaihlo zuk leh hmuam laka fimhlim turin a chah a ni.

Chief Minister chuan kuhva kau atanga thleng, no leh bowl siamna khawl  chu Women Farmers' Club, Kawnpui hnenah a hlan bawk a ni.

He hunah hian I&PR Minister Pu Lal Thanzara, Tuirial (ST) A/C bialtu MLA Pu Hmingdailova Khiangte, Kolasib Bawrhsap Dr.Arun T IAS, Kolasib SP Abhisek Dhania, IPS te bakah khawtlang hruaitute leh Thingdawl khaw mipui thahnem tak an tel a ni.

Chief Minister Pu Lal Thanhawla chuan nizan khan Bairabi atanga Tlawng Lei a hawng zo Kolasib a thlen hlimah Kolasib a Sawrkar Department hrang hrang hotute chu Circuit House-ah Kolasib DC Dr. Arun T hovin inkawmhona hun a hmanpui a. Chief Minister chuan sawrkarin ram hmasawnna tur programme kalpui hrang hrangte a lo hlawhtlinna chu policy duan a dik avangte, beneficiary ten an hman that avangin leh a kaihhnawih sawrkar Department thawktuten hma an lak that vang a nih thin thu a sawi a. Head of Department te chu mipui rawngbawltu an nihna hre reng chunga dawr nuam tak leh thahnemngai taka thawk thin tura chah in, an hnathawhna leh mimal nunah invawng reng turin leh sawrkar kalphunga an mawhphurhna te tha taka hlen a, langtlang sawrkar siamtu tur pawimawh an ni tih hre reng turin a chah bawk a ni.