Kum 1999 atanga kumtin a Green Mizoram Day hman thin chu kumin ah pawh hman leh niin, vawiin khan Mizoram District hrang hrangah hman a ni a. A hmanna pui ber chu Chief Minister Pu Lal Thanhawla, Chairman, State Level Committee on Green Mizoram leh Forest changtu Minister ni bawk hovin tukin zing khan Chite Lui Kam, Ramthar leh Thuampui inkara Lei bulah neih a ni.

Vawiina Green Mizoram Day hmannaah hian Revenue Minister Pu R. Romawia; Finance Minister Pu Lalsawta; School Education Minister Pu H. Rohluna; Mizoram Legislative Assembly Deputy Speaker Pu R. Lalrinawmna; Political Adviser to CM PU Lalrinmawia Ralte; MLA Dr. Ngurdingliana, MAMCO Chairman ni bawk, Lt. Col.(Rtd.) ZS Zuala leh Dr. BD Chakma te bakah Sawrkar hotulu Secretary-te leh mi pawimawh dangte an tel a. Green Mizoram Day pualin helai hmuna thing phunna hun 'Ceremonial Planting' neihah Chief Minister leh Sawrkar mi pawimawh ten thing tiak an phun a ni.

Chief Minister Pu Lal Thanhawla chuan ramngaw humhalh leh thing phun uar inzirtirna kawnga hmalakna chu 1998 khan Green Aizawl tia vuahin Mizoramah bultan a lo ni tawh a, a kum leh 1999 khan Green Mizoram tia vuahin chuta tang chuan kum tin khaihlak lova Mizoram pumpuia kalpui a nih tak thu a sawi a. Heihi environment humhalh leh siamthat bakah faina leh thianghlimna nen pawh inkungkaih vekin, changkanna a nih thu te, Green Mizoram hmalakna chu state dangte pawhin entawntlak a an ngaih thu te a sawi. Green Mizoram bultan a nih atanga thing phun tawh chu nuai 37 vela chhut a nih thu sawiin Chief Minister chuan a phun mai nilo a humhalhna kawngah pawh tan lak tel a tul thu a sawi a. Monitoring Committee lamin hma an lak that avanga thing phun nung chhuak zat in hma a sawn zel chu lawmawm a ti bawk.

Mipui nawlpui, thangthar leh pawl hrang hrang ten nungcha len ramngaw humhalh nachang hre thar a, hma an la chho chu lawmawm a tih thu Chief Minister chuan a sawi a. Mizoram chu Biodiversity lama India rama sang ber pawl niin, hengte hi mihring tan a tangkaiin a hlu a, kan state hmasawnna atan a thil pawimawh tak pakhat a ni tih hriaiin, kan tualto thing leh mau leh hnim te hi humhalh nachang kan hriat thar a tul a ni, a ti a. Ramhmul damdawi a sawi te tangkai zawka hman a nih theih nana zirchianna hmunpui, Research Centre din tura Mizoramin sawrkar laipui a dilna pawh a thuphunga pawm a nih tawh thu a sawi bawk.

Chief Minister chuan Kangmei laka inven lamah hmasawn zel kan la mamawh a ni tiin, kawngsir a huan leh lo neite pawhin Roadside Reserve zuah tur chin a awm tih hre tura a duh thu a sawi a. Silai hman chungchangah pawh Dan ngaihpawimawh nachang hriat thar tul a tih thu a sawi. Green Mizoram hmalakna chuan hma sawn viau tawh mahse thang leh thar zelte tan a nih thu sawiin, sawrkar anga hmalak chu a tawk mai lova, kan zavaiin he thilah hian mawhphurhna leh tih tur kan nei a ni a ti a. Tang zawka thawhpuiah kalkhawmte a sawm a ni.

Chief Minister hian kangmei venna kawnga District ti tha te leh Aizawl District huam chhunga mei kawng sial a khaw ti tha te ber te hnenah "Fire Prevention Award" a hlan a. Kangmei venna kawnga District ti tha ber chu Lunglei District niin, pahnihna chu Mamit District an ni a, pathumna chu Serchhip District a ni a. Aizawl District-a kangmei venna kawnga khaw ti tha ber chu Hlimen niin, pahnihna chu Rulchawm an ni a, pathumna chu Sawleng an ni a. District ti tha ber hian lawmman cheng 50,000 bakah thuziak leh Khitea Running Trophy an dawng a. District dang leh khua ten thuziak leh lawmman pawisa fai (pahnihna in cheng 30,000, pathumna in  cheng 20,000) an dawng bawk a ni.

Vawiin programme-ah Chief Minister hian "State of Environment Report on Mizoram 2016’’ chu a tlangzarh nghal a bawk.

Vawiina Green Mizoram Day hun kaihruaitu Chief Secretary Pu Arvind Ray chuan kumina Green Mizoram Day Aizawl leh District hrang hranga hman chuan chhuan leh lo awm zel tur tan rah tha a chhuah a beisei thu leh, khawvel thar leh nuam zawk siam tura ke penna a nih avanga lawmawm a tih thu a sawi a. Principal Chief Conservator of Forests leh Member Secretary, State Level Committee on Green Mizoram ni bawk Pu Lalram Thanga chuan Green Mizoram Day tobul leh hman chhoh a nih dan te, hemi hnuaia hmalakna leh hmasawnna awm te a sawi a, Chief Wildlife Warden Pu Liandawla'n lawmthu sawiin hun a khar a ni.

Vawiina Green Mizoram Day-ah hian Chite Lui kama Ceremonial Planting neih bakah Department hrang hrang atanga volunteer ten mahni hmun bik ruahmanah hing an phun bawk a ni. Kumin atan State Level Committee chuan "Thingphun belh la, a awmsa humhalh rawh" tih chu thupui atan thlanchhuak a. Green Mizoram Day hian a hranpa in Logo leh Thupui (Everyone Grow One) a nei hrim hrim bawk a ni. Thing tiak phun te ngaihven a enzuitu Monitiring & Evaluation Committee chu kum 2014 khan din a ni. Report a tarlan danin nikum 2017 khan thing tiak 24,342 phun a ni a, a thlawnin 77,535 sem ni bawkin, heng atang hian 81.45% an dam a ni. Electronic leh Print media kaltangin leh eduction dept nena thawkhova awareness lama hmalak reng a ni bawk.

Tunah hian EF&CC Department hian division hrang hrangah thingtiak kum 2 aia naupang lo nuai 3.38 - a par mawi chi te, a rah ei chite a nei a, sawrkar department leh tlawmngai pawl hrang hrangte phun atan mamawhte chuan a ngaihven theih a ni.