Mizoram hmun dangte rualin vawiin khan Champhai District chhunga Green Mizoram Day hmanna pui ber chu Mualbuhvum, Zote Road-ah neih a ni. He hunah hian hawnna inkhawm tawi neih hmasak niin Pu Liansangzuala Chhakchhuak Champhai Addl DC chu khuallian a ni a, thingphun hnatlangpuiin a chhunzawm nghal a ni.

Khuallian Pu Liansangzuala Chhakchhuak chuan Green Mizoram Day hmang tura kalkhawm Sawrkar Department leh NGO te thahnemngaihnaah lawmthu a sawi a. Ramngaw leh nungcha chereu zel humhalh chu mitinte mawhphurhna anih thu sawiin, Green Mizoram Day chu kum tin 1999 atangin urhsun taka hman  thin a ni, a ti a. Sawrkar laipuiin ramngaw humhalh leh sik leh sa thlak zel angaih pawimawh thu leh hemi atan hian Ujjwala Scheme leh Scheme hrang hrangte siamin Ministry of Environment and Forest tih thin kha Ministry of Environment, Forest and Climate Change  tiin a thlak tawh thu a sawi a. Kan ram  Pathianin a duh anga a siam min pek hi kan fate hnena kan rochun tur ni lovin an hnen atanga kan hawh sak zawk a ni, a ti a. Tuna kan tihchereuna zawng zawng hi kan tuar mek tawh a, a enkawl zui zelna chu kan mawhphurhna liau liau a ni, a ti a. Ram ngaw leh nungcha humhalhna kawnga District mipuite thahnemngaihna chu fakawm a tih thu a sawi a. Thingphun hnatlang tura feh chhuak zawng zawngte chu hun tha leh duhawm tak hmang theuh turin duhsakna a hlan a ni.

He hun hi Pu VL Chama Hnamte, President, Sub-Hqtrs. YMA in kaihruaiin Champahai chu thingphun uar kawnga zoram  mipuite entawn ni turin a chah a. Pu C. Lalbiaka DFO & Member Secretary chuan report a pe a. Report-in a tarlan dan chuan Champhai chu Mizoram District 8 zinga Forest Cover nei tlem ber niin, tun dinhmunah Forest Cover area chu za zela 81.73 a awm mek thu a sawi a.   Kangmei ven hapta leh kengmei hluar hun chhunga khua leh chanchinbu thawkthate hnenah khuallianin lawmman hlanna a nei a. Kangmei veng tha khuate chu a indawt danin Pawlrang, Chalrang, Biate leh Lungtan te an ni a, VC leh YMA hnenah lawmman pawisa fai leh Citation hlan a ni.  Chanchinbu thawhhlawkte  chu Pakhatna Khawzawl Times,  Pahnihna Lenrual niin, Pasaltha chu pathumna  a ni. Heng bakah hian Consolation Prize sem chhuah niin Samthang khaw YMA Branch hnenah Kawngpui kama thingphuna kawng cheimawi tha lawmpuina Citation hlan a ni bawk.

Vawiin Green Mizoram Day pual hian Planting Agency hrang hrang leh Sub-Hqtrs YMA ten Thing tiak kung 215 lai an phun a, a hungna pawh tha takin an siam nghal bawk a ni. Department thenkhat pawhin mahni ramah he ni pual hian thing tiak an phun ve bawk a ni.