No.923/2021-2022  

Dated Serchhip, the 11th June, 2021: Serchhip District a Green Mizoram Day, 2021 lawmna hun Thenzawl Golf Course ah vawiin hian official pawimawh mi tlemte kalkhawm hmanga buatsaih a ni a. Pi K. Lalrinzuali, Secretary, Tourism, Govt. of Mizoram chu khuallian niin, Golf Course ram chhungah thingphunna neih nghal a ni.

Green Mizoram Day, 2021 hawnna inkhawm tawi hi Golf Course Multipurpose Hall ah neih niin he hunah hian Pi K. Lalrinzuali chuan, tun hnai maia kan ramin tuihna leh sik leh sa lama harsatna a tawh dan en mai pawhin; ramngawte din thara, thing leh maute humhalh a tul zia a lang chiang em em mai a. Ram mipui zawng zawngten hemi kawnga hmalaknaah hian mawh kan phur a ni tih hriaa, kan tan tlan a tul hle a ni, a ti a. Serchhip District Level Task Force on Green Mizoram hmalakna te, Pu Kumar Abhishek, IAS, Serchhip DC thahnemngaihna te leh Pi Margaret Lalramchhani, DFO Thenzawl leh a thawhpuite inpekna chu fak tlak nia a hmuh thu a tarlang bawk.

Khualzahawm Pu Kumar Abhishek, IAS, DC Serchhip pawhin thusawiin, mihring kan pung zela, mamawh a punga, leilung nihphung a inbuktawk lo tial tial a. Mizoramah kum rei vaklo ka awm chhung maiin a changin namenlovin ruahtui kan dawng tam a, leimin, tuilian leh chhiatna a hring nasa a; a changin ruahtui dawng mumal lovin kan awm bawk a, tuihna harsatna tinrengin min tlak buak thin. Hetiang harsatna kan dawn chhan ber chu khawvel boruak danglam zel vang a ni. He harsatna laka kan inven theihna pawimawh em em pahnih chu Thing phun uara enkawl puitlin leh Plastic lam thil hman tlem a ni a, heng hmalakna kawng hnihte hmanga nasa taka he harsatna beih let hi tuna kan mamawh, kan tuchhuan lo la awm zel turte tana pawimawh chungchuang a ni, a ti. District Administration chu Thing phun leh enkawl puitlin kawngah a tang hle a, kuminah pawh ram kangin a tihchhiat tawh Chanmary venga hmun pakhat chu tuai thara thing hring hmuna siam leh atan thlangin vawiinah ngei pawh hian DC Office thawktute leh khawtlang hotute kan hnatlang a ni, a ti.

He inkhawm hi Pi Margaret Lalramchhani, DFO, Thenzawlin a kaihruaia, kum kalta chhunga Serchhip District a ram kang venhimna lama thawk tha khuate hnenah lawmman sem a ni a, lawmman dawngtute chu: Pakhatna Vanchengte, pahnihna Sialsir leh Khawbel niin pathumna chu Chekawn leh E. Lungdarte an ni. Lawmman pakhatna hian Thuziak leh pawisa fai Rs. 50,000 a kenga, pahnihna hian Thuziak leh pawisa fai Rs. 30,000 kengin khaw pahnihin an dawn avangin Rs. 15,000 ve ve a dawn tir an ni a, chutiang bawkin pathumna pawh khaw pahnihin an lak avangin Thuziak leh pawisa fai Rs. 10000 chu Rs. 5000 ve ve a dawn tir an ni. Lawmman te hi khuallian Pi K. Lalrinzuali’n a dawngtu khuate bialtu Forest Range Officer hnenah a hlana, annin khawtlang hotute hnenah an hlan ve leh dawn a ni. Tin, Serchhip District-a chanchinbu; kangmei venna inzirtirna lama thawktha Lenkawl Daily Newspaper hnenah Thuziak leh pawisa fai Rs. 5000 hlan a ni bawk a, Editor Pu Zonunsanga Kawlni chuan he lawmman hi a dawng a ni.

Inkhawm tawi neih zawh hian Golf Course ram chhungah official kalkhawmte hian Thing phunna hun an nei zui a ni.

Vawiina Green Mizoram Day, 2021 hmannaah  hian Tourism Jt. Secretary Dr. Irene Zohlimpuii Chawngthu, Director Pu V. Lalengmawia, Pu Lalmuansanga Ralte, Addl. DC Serchhip, Pu Amol Srivastava, IAS, SDO Thenzawl leh official pawimawh mi tlemte an tel a ni.