No.922/2021-2022 


Aizawl, the 11th June 2021 : Vawiin chawhma khan Rural Development, Land Revenue & Settlement leh Information & Public Relations changtu Minister Pu Lalruatkima’n Green Mizoram Day, 2021 puala inkhawm tawi Mizoram College of Nursing (MCON), Falkawna neih chu a hmanpui. Function zawhah Minister leh Environment, Forest & Climate Change hotuluten Green Mizoram Day 2021 tihhlawhtlin nan MCON hmun hmaah thing tiak an phun a ni.

Pu Lalruatkima chuan COVID hripui lengin Mizoram a luhchilh avangin Green Mizoram Day pualin programme lian tham buatsaih theih a ni lova, mahni awm hmunah theuh mahni remchan dan angin kumina thupui ‘Tuihna leh Boruak tha siam nan thing i phun ang u’ tih chu tihlawhtlin tum turin mipuite a sawm a. Mizoramin kuminah ram kang leh tuihna kang chat chu kum dang aia nasain a tuar a. Heng thil thleng te hian ramngaw tihchereu pawizia, ramngaw humhalh tulzia leh thingphun uar  pawimawhzia Mizoram mipuite thinlungah tuh se a duh thu sawiin Minister chuan ramngaw chereu leh tuihna kang chat venhim kawngah tan la leh zual turin mipuite a sawm a ni.

Minister chuan a Department enkawl Land Revenue & Settlement leh Rural Development te chuan EF & CC Department nen tang tlangin ramngaw humhalh leh tuihna humhalh/siamthat kawngah theihtawp an chhuah thu a sawi a. Ramngaw leh nungcha humhalh kawnga hma kan sawn chho zel nia a hmuh thu sawiin humhalhtu leh vengtute ngaihsan nachang kan hre thar a, hei hi hmasawnna pawimawh tak nia a ngaih thu a sawi. Kan tu leh fate chenna tlak ram kan hnutchhiah theih nan ram ngaw humhalh kawngah mitinin kan ngaihtuahna kan sen mai bakah a taka hma kan lak theuh a tul hle a ni, a ti bawk.

He hunah hian kum 2021 chhunga kangmei ven kawnga District titha ber, pakhatna - Mamit District,  pahnihna - Serchhip District leh pathumna - Siaha District te hnenah lawmman pek an ni a. Aizawl District chhungah, kangmei ven kawnga thawk tha zual khaw pathum, pakhatna -Sumsuih, pahnihna-Tachhip leh pathumna - Mualkhang khuate hnenah lawmman hlan a ni bawk. Lawmman pakhatna hian sumfai cheng 50,000; pahnihna-in cheng 30,000 leh pathumna-in cheng 20,000 bakah citation a keng tel a ni.   

He hunah hian Pu Pu Lalruatkima bakah, Pu Liandawla, IFS, Principal Secretary; Pu Jitendra Kumar, IFS, PCCF;  Dr.Lalhriatzuali Ralte, IAS, Deputy Commissioner, Aizawl leh Officer dang ten thing an phun a ni.

Attachment

  • Loading attachment...