728/2023-2024

Aizawl, the 9th June 2023 : Vawiin khan SRDC leh HRDB thawktuten Tlawng road (Reiek kawng)ah thingphun hnatlang an nei.

He mi puala hun tawite hmannaah SRDC Chairman leh HRDB Vice Chairman Dr. L.Thangmawia, MLA chuan thu sawiin SRDC leh HRDB a a thawhpuite hnenah thingphun hnatlang an nei ho thei chu lawmawm a tih thu leh thingte hi a phun ringawt ni lovin a enkawl zui leh an thanlen dan a zir zela a hungna siam that zel leh enkawlzui hi kan mawhphurhna ah i ngai ang u tiin, kan chhehvel thing leh mau vawnhim hi hmanlai kan Pi pute leh Mizo Lalten an lo ngaih pawimawh em em thin a ni a, thangtharte zingah ngaih pawimawh kan in zirtir thar zel a tul tak zet a ni a ti a, Tunhnaiah tlawng road sira bawlhhlawh paih ruk ching mi tlemte te avangin a hungna siam hial a ngai ta a, mi thahnemngai ten Tlawng lui humhalh tura hmalain in zirtirna leh ngenna pawh chanchinbu, TV leh Social media kaltlangin nasa taka neih a ni tawh a, mitin ten zawm theuh turin ka ngen a ni a ti.

Dr. Thangmawia chuan Guwahati-a Union Minister hova Brahmaputra Board meeting-ah Mizoram sawrkar aiawha Tlawnglui humhalh a tul thu leh Central sawrkarin sum a tul anga a pek a tul thu theihtawpa a lo auchhuahpui tawh thu sawiin Zoram mipuite tui hna humhalh kawngah leh thing leh mau humhalh leh siambelh kawngah tan nasa leh zuala la turin ka sawm a ni a ti.

Khawtlang, Tlawmngai pawl leh mimal, Tlawng lui humhalh tur te, Tui hna humhalh tur leh thing leh mau humhalh tura theihtawp chhuah thintute leh chhuah mek tu zawng zawng te chungah Zoram mipuiten lawmthu kan sawi a ni a ti bawk.