727/2023-2024

Champhai, the 8th June, 2023: Mizoram Social Defence & Rehabilitation Board hnuaiah Mizoram State Legal Services Authority (MSLSA) buatsaihin vawiin khan Venglai Community Hall, Champhaiah ruihhlo dona dan 'Narcotic Drugs and Psychotropic Substances Act, 1985' chungchang zirhona buatsaih a ni.

He hun Pi Sylvie Z.Ralte, Addl. District & Sessions Judge, Champhai Judicial District kaihhruaiah hian khuallian Pu Vanlalena, Member Secretary, State Legal Services Authority chuan ruihhlo avangin thalai mipate'n nunna an chan nasat thu sawiin, ruihhlo do leh man kawngah a man theitu force leh khawtlang mipuite tha thlah lova tanrual a ngai a, ruihhlo kaihhnawiha sumdawnna rawn hluar tur ben daih hi kan hnam humhalhna atana thil pawimawh tak a ni, a ti a. Ruihhlo avanga sumdawng mante hrem kawngah a mantute leh hriatpuitute an pawimawh hle thu sawiin, dan anga ruihhlo tawlhtute hrem an nih theih nan ND&PS Act hi a mantute mai ni lovin hriatpuitu witness-a tang thinte leh NGO te'n kan hriatchian a tul a ni, a ti bawk.

Thusawitu dang Pu Lalrinpuia Varte, Champhai District SP chuan ruihhlo tawlhrutute lakah dimna tel lova hmalak a tul tawh takzet thu sawiin, a hremna hnuaiah lung in an tan piah lamah dan lova an sum lakluh atanga in leh lo an lo dinte laksak theihna chu Police-in an kalpui tan mek thu a sawi a. Hemi kawngah hian khawtlang leh tlawmngai pawl hruaitute puihna an mamawh tih sawiin, he hmalakna hian ruihhlo tawlhna tih rem kawngah rah tha a chhuah ngei a beisei thu a sawi bawk.

He hunah hian Pu Liansangzuala, District & Session Judge, Champhai Judicial District chuan Mizoram chu ruihhlo siam chhuahna hmunpui hnaih leh a tawlhrukna kalkawnga awm a nih thu tarlangin, hemi lakah hian kan lo inven a ngai a, a man theitu Police leh Excise-te thuam chak an ngai a ni, a ti a. Champhaiin District & Sessions Judge a neih hnua Champhai District Court-a chinfel theih chi hrang hrangah insurance, consumer, domestic violence leh adangte tun aiin mipuiin hmang tangkai thei se a duh tih a sawi bawk.

Dr. PC Lalawmpuia, MD, District Hospital Champhai chuan ruihhlo ngawlveina leh a enkawl chungchangah zirtirna a pe a. Zawhna leh chhanna hun hlawkthlak tak hman a nih hnuah Pu V. Vanlalhriata, Chief Judicial Magistrate (CJM), Champhai chuan lawmthu sawiin hun hman a khar a ni.

Vawiin ND&PS Act 1985 chungchang zirhona hunah hian Champhaia tlawmngai pawl, home enkawltute, media, Police leh Excise-te an tel a ni.