726/2023-2024

Lunglei the 8th June' 2023: Vawiin khan Govt. J. Buana College, Lunglei chuan kalchhuakte thlahna Valedictory Day an hmang a, Agriculture Minister Pu C. Lalrinsanga chu khuallian niin HPC Vice Chairman Pu Lawmawma Tochhawng chu khualzahawm niin an hmanpui.

He huna khuallian Pu C. Lalrinsanga chuan Govt. J. Buana College chu amah ngei pawh a lo kal tawhna a nih thu leh mi ropui tak tak Minister te hial a lo hring chhuak chu lawmawm a tih thu a sawi a, zirna emaw hnathawhna leh thil tihna apianga Pathian dah hmasak chu thil pawimawh a ni tiin zirna kawng hrang hranga kal tur te pawhin eng kawngah pawh harsatna tawh pawh a mahni zawnah taima leh chhel taka ke pen a tul thu a sawi a ni. Minister chuan sawrkar hna lak a harsat tawh thu sawiin mipui mimirin sawrkar hna kan duh tlangpui a, chutih lai chuan ramin a mamawhna zawn hria a chutah chuan theihtawp chhuah tur leh sawrkar hna atana za a za rilru pe lo turin zirlai kalkhawmte a chah a ni.

Pu Lawmawma Tochhawng, Vice Chairman High Powered Committee, Lunglei pawhin zirlaite fuihna thu sawiin zirna industry atanga zirlai chherchhuah i ni em tih ngaihtuah a, ruahmanna fel tak siam a ngaih thu sawiin he college atanga zirchhuak tur te chu taimakna leh tuarchhelna nena an kal leh zelna turah hlawhtlin pui turin a chah a, he College atang an chhuah hnu ah pawh mahni intohdelh a midangte ruaitu ni thei tura inbuatsaih a, an thiamna te mamawh tu Nu leh Pa, unau, khawtlang, Lunglei District leh Mizoram tan a ni tih hre turin a duh a ni. He College atanga mi puitling chherchhuah hi chhunzawm zel turin zirtirtute a chah bawk a ni.

Govt.J. Buana College Principal Pu Lallianzuala chuan lawmna thusawiin Valedictory Day sawmna ngaipawimawhtu Agriculture Minister Pu C. Lalrinsanga leh HPC Vice Chairman Pu Lawmawma Tochhawng te chungah lawmthu a sawi a, he College atanga zirchhuak tur te chu zirna chhunzawm emaw eizawnna lamah emaw tumna tak tak nei a kal a, taimakna leh rinawmna nena hlawhtlinpui ngei turin a chah a ni.

Pu Lalrotluanga, Associate Professor, GJBC chuan fuihna thu sawiin, C.Lalnunhlimi, VI Semester, B.Com in zirlai chhuak tur te aiawhin thlahna thu a sawi bawk.

Govt. J. Buana College ah hian zirlai 500 chuang awmin zirtirtu 48 an awm a ni.