725/2023-2024

2023 Nikir thla ni 8: NABARD (RIDF-XXVI) aṭanga cheng nuai 267.15 senga sak Ṭawipui 'S' Primary Health Centre (PHC) building thar chu vawiin khan Mizoram Health Minister Dr R. Lalthangliana chuan a hawng.

Health Minister Dr R. Lalthangliana chuan Ṭawipui 'S' PHC building thar banga chhinchhiahna lungphek phum zar hliahna puanzar pawt hawngin, kawngkharpuia ribbon zam a cheh chah hnuah building chhung lam a fang kual nghal a. Hemi hnu hian Ṭawipui 'S' PHC building thar lawmna inkhawm buatsaih zui a ni.

Health Minister chuan Ṭawipui 'S' PHC building sak thar ṭha tak hawn theih a ni ta chu lawmawm a tih thu a sawi a. Uluk taka enkawl zui tur leh damlote'n tisa leh thlarauva damna an channa hmun a nih theih nana ṭangkai taka hmang turin thawktute leh khawtlang mipuite chu duhsakna a hlanin, a chah a ni. Sawrkar chuan ram mipui hriselna a ngai pawimawh hle tih sawiin, Mizoram hmun hrang hrangah Hospital, PHC, Health & Wellness Centre, Sub-Centre, Clinic, office leh thawktu quarters eng emaw zat sak zawh tawh leh sak tura tihfel tawh a awm tih a sawi a. Mizorama sub-centre eng emaw zat chu health & wellness centre-ah hlan kai niin, hriselna kawnga hmasawnna chuan state pum a tuam a ni, a ti.

Health Minister chuan COVID-19 hri leng vangin ramin harsatna nasa tak tawk mah i la, ram mipui ṭan rualna avangin hun khirhkhan kan tawn tlang a, hriselna kawngah COVID-19 laiin khawl leh hmunhma tihchangtlun lamah ramin hmasawnna tam tak a neih phah tih a sawi a. COVID-19 karah Pathianin hna min thawhsak a ni, a ti.  Sawrkarin theih tawpa hma a lakna azarah World Bank aṭangin hriselna lama mamawh phuhrukna tur leh tihchangtlunna tur sum cheng nuai hlir nuai 28,000 hmuh a nih thu sawiin, state sawrkarin budget-a sum a dah bak, sawrkar laipui aṭang leh JICA leh ram chhung leh ram pawn agency hrang hrang aṭangin hmasawnna hna thawhna tur sum eng emaw zat hmuh tawh leh beisei mek a awm bawk tih a sawi a. Hriselna kawnga hma lakna leh sawrkar hma lakna hrang hrangah sum leh thawktu awm mah se, mipui thlawpna leh thawhpuina tel lo chuan hmasawnna leh hlawhtlinna tluantling a awm thei lo tih sawiin, ram mipuite chu sawrkar hma lakna theih tawpa thlawp leh ṭawiawm ṭhin turin a chah a ni.

He huna khual zahawm Lunglei South Bialtu MLA, Bamboo Development Board Vice Chairman Dr K. Pachhunga chuan Ṭawipui 'S' PHC chu khaw chhehvel mipui tan a ṭangkai bakah, national highway-in a pal tlang a nih avangin khualzin harsatna tawkte tan pawha pan remchang tak a nih thu sawiin, sawrkarin ngai pawimawha building thar sak leh tihchangtlun a ni chu lawmawm a tih thu a sawi a. Lunglei South bial chhunga sub-centre-te chu health & wellness centre-ah hlan kai deuh vek a nih thu sawiin, tui harsatna su kiang tura Solar Water Supply Scheme ṭha tak siam a nih avang te, supply kudam leh thawktu quarters sak thar leh hmasawnna hna thawh hrang hrang avangin sawrkar chungah lawm thu a sawi a ni.

Building thar hawnna hun hi Mizoram Sawrkara Health & Family Welfare Department hnuaia Director of Health Services Dr Vanlalsawma chuan kaihruaiin, kal khawmte lawmna thu a sawi bakah, Health Minister Dr R. Lalthangliana kaihhruaina hnuaiah H&FW Department-in nasa takin hma a sawn a, infrastructure lamah pawh hmasawnna nasa tak hmuh tur a awm tih a sawi a. Baptist Church of Mizoram (BCM) Ṭawipui Bialtu Pastor Rev. T. Hmangaih Vulluaia'n hunserh hmangin, Public Works Department (PWD) Building Division Lunglei Sr Executive Engineer Er Malsawmdawngliani hnen aṭangin technical report ngaihthlak a ni a. Lunglei Chief Medical Officer Dr LC Liana'n lawm thu sawiin hun a khar a ni.

Vawiina Ṭawipui 'S' PHC building thar hawnnaah hian LADC-a member-te, H&FW Department aṭangin officer pawimawh leh thawktute, sawrkar official dangte, MNF party hruaitute, village council ai awhte, tlawmngai pawl hruaitute leh khawtlang mipuite an kal khawm a ni.

Ṭawipui 'S' PHC building hi NABARD Rural Infrastructure Development Fund-XXVI aṭanga ₹ nuai 267.15 senga sak a ni a. February 1, 2022 khan hna ṭan niin, kum hnih chhunga sak zawh tura ruahman a nih laiin, a sak nan kum khat chauh hman niin, February 15, 2023 khan thawh zawh a ni. A building hi RCC-a sak niin, a bulṭhutah teh kualin square metre 592.96-a zau a awh a. Medical Officer office, nurse leh staff room, consultation room, khawl dahna room, casualty, laboratory, minor operation theatre, female ward, male ward, main centre, hall leh pindan dang eng emaw zat a awm a ni.