724/2023-2024

2023 Nikir thla ni 8: Mizoram Health Minister Dr R. Lalthangliana chuan vawiin khan Lawngtlai tlawhin, District Hospital Lawngtlai a tlawh bakah, CMO Conference Hall-ah health department-a thawktute nen hriselna lama District chhung dinhmun thlir hona leh hma lak zel dan tur sawi hona hun an hmang.

Health Minister hi Health & Family Welfare Department aṭangin Director of Health Services Dr Vanlalsawma leh official dangte'n lo ṭawiawmin, Lawngtlai Helipad-ah LADC Chief Executive Member Pu V. Zirsanga leh LADC-a member-te, Lawngtlai Bawrhsap charge la mektu Pu Abraham Beirazi Khithie leh sawrkar official-te leh District MNF party hruaitute'n an lo dawngsawng a ni.

Health Minister hian District Hospital Lawngtlai a tlawhnaah District Medical Superintendent Dr Beiparysa K. hovin thawktute'n lo dawngsawngin, an dinhmun, an mamawh leh harsatna te a hnenah hian an lo thlen a. Minister chuan District Hospital Lawngtlai chu fang kualin, an dinhmun a enfiah a. H&FW hotute leh DHL-a thawktute nen damdawi in tihchangtlun dan tur hrang hrang an sawi ho nghal bawk.

Hemi hnu hian CMO Conference Hall-ah health department-a thawktute nen hriselna lama District chhung dinhmun thlir hona leh hma lak zel dan tur sawi hona hun buatsaih a ni a. He hunah hian Health Minister chuan thu sawiin, hriselna lamah Lawngtlai District-ah hmasawnna hmuh tur tam tak a awm laiin, ṭan lak ngaihna lai eng emaw zat a la awm tih a sawi a. Hriselna kawnga hma laknaah sawrkar leh thawktute chauh tih theih a ni lo va, mipuite nen ṭang ruala hma lak a ṭul tih a sawi a. Mizoram chu India rama malaria hluarna state te zinga mi a nih thu leh Mizoramah Lunglei, Lawngtlai leh Mamit district-te chu Malaria hluarna a nih thu sawiin, he'ng district pathumah te hian Malaria dona kawngah ngawrh zawka hma lak tuma ruahmanna siam a nih thu te, state sawrkarin theih tawp a chhuah bakah, sawrkar laipuiah pawh hemi kawnga hma lakna tura mamawh hrang hrangte pawh thlen a nih thu a sawi.

Health Minister chuan COVID-19 vangin sawrkar hma lakna tur hrang hrang khaihlakin, hna lak theih loh tam tak a awm a, tunah hian hriselna kawnga thawktu indaih lohna hnawh khat tur leh hmanrua leh hmasawnna ruhrel tihchangtlun kawngah pawh hma lak zel theih a beiseiawm tih a sawi a. COVID-19 dona kawngah sawrkar, kohhran, tlawmngai pawl leh mipuite ṭan rualna avangin Mizoram chu dinhmun ṭha takah a ding tih sawiin, COVID-19 dona kawnga kan ṭan rual ang bawk khan Malaria dona kawngah hian mipuite ṭang ho i la, Malaria hi kum 2025-ah chuan Mizoramah um bo theih a nih a rin thu a sawi a. Malaria chu thihna thlentu a ni tih kan hriat chian a, a dona kawngah mipui kan ṭan rual a ngai tih sawiin, inzirtirna nasa zawk a awm theih nan a theihna hmun apianga sawi darh zau a ṭul tih a sawi bawk.

He hun hi Lawngtlai Chief Medical Officer Dr LP Malsawma chuan a kaihruai a. State PH Consultant (VBD) Pi Malsawmthangi Pachuau chuan Mizoram leh Lawngtlai District-a malaria dinhmun leh hma lakna tur ruahmanna te presentation a pe a, Director of Health Services Dr Vanlalsawma leh DHL DMS Dr Beiparysa K. te'n thu an sawi bawk.