681/2024-2025

Kolasib dated 5th June, 2024: Vawiin chawhnu khan DC Conference Hall, Koalsibah District Level Committee on Green Mizoram Day 2024 chuan thutkhawmna neiin June ni 11, 2024-a ‘Green Mizoram Day’ pual a hun hman dan tur an rel a. Pu John LT Sanga, Deputy Commissioner chuan hun kaihruaiin Pi Smilna Sudhakar, IFS, DFO chuan thu rel tur hrang hrang sawi zauna hun a hmang.

Thutkhawmnaah hian kum 2023-a ‘Green Mizoram Day’ pual a hun hman dan thlirlet niin District chhunga Office hrang hrang hnen ah thing tiak phun tur 905 sem chhuah a nih thu te, mimal hnen ah 580 leh khawtlang leh pawl hrang hrang hnen ah thing tiak 2460 phun tur a pek chhuah a nih thu sawi a ni a. Excise & Narcotics Department Complex, Khuangpuilam ah khuallian te nen hun hman a nih dan leh ram kang ven kawng a titha Village Council pathum, Bairabi North, Saipum leh Hortoki VC-te hnen ah lawmman hlan a nih thu te tarlan a ni.

Kumin Kolasib District-a ‘Green Mizoram Day 2024’ thupui atan ‘I nunna atan thing phun rawh’ tih thlan a ni a, a lawmna tur hmun atan 1st IR Battalion Headquarters, Mualvum, Kawnpui chu ruahman niin khuallian atan Pu Lalfamkima, Deputy Speaker chu sawm ni se tih rel a ni bawk. Ram kang ven kawng a Village Council titha thlan chhuah leh tur a ruahman niin lawmman pawh siam leh tur a ni a, thutkhawmna ah hian endiktu tur ruat nghal a ni. Green Mizoram day 2024 pual a Office, khawtlang, pawl leh mimal thing phun duh te tan june ni 11 hma ngeiin Divisional Forest Office, Kolasibah dil theih a nih thu tarlan a ni bawk. Heng thing tiakte hi DFO Office-ah a dil theih a ni; Herhse, Ngiau, Zawngtei, Khuangthli, Rain tree, Thlado, April, Chawmzil, Lenhmui, Theihai, Tatkawng, Silver fir, Ashoka leh Archangkawm.