680/2024-2025

Kolasib dated 5th June 2024: Vawiin chawhnu khan Pu R.Lal Rinawma IRS(Rtd) Vice Chairman,  Mizoram State Project Monitoring Committee chuan Eklavya Model Residential School, Bilkhawthlir a building hrang hrang sak te a endik a, 100 Bedded Kolasib District Hospital sak mek chu a endik bawk.

Pu R. Lal Rinawma chuan EMRS hi sawrkar laipuiin Tribal-te tan a buatsaih a nih thu leh dinhmun harsa zawk a awm ten zirna tha an ban phak ve theihna tur a ruahman a nih thu a sawi a. Naupang 480 tan a thlawn a zirna tur school building tha tak Sawrkar laipuiin a rawn chhawp chhuak chu Bilkhawthlir leh a chhehvel khua tan zirna lam a hmasawnna hmanraw tangkai tak a nih ngei a beisei thu a sawi. Mizoram State Project Monitoring Committee Vice Chairman chuan hetiang school tha kan nei thei a kan awm hi lawmawm a tih thu leh a chhevel khaw mipuite pawhin neitu nihna thinglungpu chung a enkawl pui a pawimawh thu a sawi.

Eklavya Model Residential School sak mek 5 bak ah sak tur 6 a awm thu tarlan niin a tul anga tihchangtlun hna pawh thawh zel a nih tur thu sawi a ni. EMRS hi kum 2020 kum tir atang khan hna hi thawh tan niin, Social Welfare Department enkawlna hnuai ah Cheng Vbc. 24 hmangin JMT Architect-ten an thawk a. Tun ah hian hna hi an zo fel tawh thawkhat tawh a ni. Zirna hi tun thla atangin kalpui tan tum niin hmalak mek a ni a.  Kumin Academic session ah hian Class VI leh Class VII kalpui tum a ni a, naupang hi Class khat ah mipa leh hmeichhia 30 zel awm thei tur a ruahman a ni.

EMRS Campus, Bilkhawthlirah hian Hostel boys & girls, naupang 240 ve ve leng, School building, Dining hall, Guest house, Staff quarters building 11, chhungkaw 26 chen theihna, Principal quarters leh Power Sub Station a awm a. Tuizem  100,000 ltrs dawng siam a ni a, Basketball Court leh Volleyball Court siam a ni bawk.

100 Bedded Kolasib District Hospital hi Cheng Vbc. 8.59 seng a sak mek niin Block A, B, C-ahte then a ni a. Tun dinhmun ah hian Block A leh B-te khawih mek niin a hna hi za zel a 51 zawh tawh ang a chhut a ni a. Hna zawh hun tur a bituk sa, September 2025 chhung ngei a hna zawh a nih theih nan MSPMC Team-te chuan thawktute thahnemngai tak leh rintlak tak a thawk turin an chah a ni.

Pu R. Lal Rinawma hi Er. Vanlalruata Sailo, Secretary, George Lalzuia Committee Member, Vanchhungi, Task Force, MSPMC-te bakah Social Welfare Department atangin Pu F. Vanlalruata, Programme Manager, Pu PC. Malsawmzela, JE ten an tawiawm a ni.