679/2024-2025

Aizawl, 05.06.2024: Commerce & Industries Minister Pu F. Rodingliana leh Land Revenue & Settlement Minister Pu B. Lalchhanzova te kaihhruaiin in nimin (04.06.2024) tlai khan Industrial Growth Centre (IGC), Luangmual leh Export Promotion Industrial park (EPIP), Lengte chhunga harsatna hrang hrang awmte chinfel dan tur ngaihtuahin Department pahnih ten Joint meeting an nei a. Heng Industrial Areas chhunga dan lova awmte leh dan lova hmalakna awmte Sorkar dan dinglai anga chinfel dan tur sawiho a ni.

He meeting ah hian Minister Pu F. Rodingliana chuan Sorkarin thalai, Industry din duh tak tak tute an ngaih pawimawh thu leh Industrial Area-a ram atana puan chhunga dan lova awm mekte chungah khauh zawka dan anga hmalak a tul thu a sawi a. Heng bakah hian Industry din nan a Sorkarin plot allotment a pek, sorkarin a pek anga hmang lo te pawh thangthar Industry din duhte hmakhua ngaia an plot cancel sak thlenga hmalak a tul tur thu a sawi a.

Minister Pu B. Lalchhanzova pawhin Department pahnihte inkarah thawhhona tha leh tanrualna a awm a pawimawh thu sawiin Inter-Departmental Collaboration tha leh Convergence Network thatak hnuaia thawhho zel a tul thu a sawi a ni.

Meeting ah hian Village Council-te chu huan atan ram pe theitu an nih loh avangin VC Pass-in tumah ram neitu nihna a pek theihloh thu leh hemi chungchanga High Court ruling leh sorkarin Office Memorandum a lo chhuah tawhte pawh thlirho a ni a. Luangmual Village Council area hi kum 1971 khan Protected Area-a puan a nih tawh avangin VC in ram pek theihna an neih loh thu leh dan lova ram lo pek tawhte pawh kum 1972 khan cancel vek a nih tawh thute leh hemi chungchanga District Council-in Executive Order a lo chhuah tawhte pawh thlirho a ni bawk. Industrial area chhunga VC Pass awmte chu dan dinglai anga chingfel thuai tura hma lak ni se tia rel a ni.

C&I Department-in industry din nana plot a pek zingah a nihna tur anga hmang lo leh hma la tha lo an awm thu leh chung zinga engemawzat chu an plot cancel a nih tawh thu sawilan a ni a. Plot pek tawh, pek an nih anga hmang lo leh hma la lote chungah pawh Industrial area (Management, Regulation and Control) Act 2008 zulzuia hmalak a nih zel tur thu pawh sawilan a ni bawk.

Chak zawka hmalak a nih theih nan Commerce & Industries Deptt leh Land Revenue & Settlement Deptt Officers-te telna Joint Task Force din turin he meeting-ah hian rel a ni a. He Task Force hian IGC, Luangmual leh EPIP, Lengte-a ram chhunga harsatna awmte enfiahin heng ram chhunga Pass nei nia inchhalte pawh an pass dinhmun uluk takin an enfiah ang a, dan anga hmalakna tur pawh a duang ang. Task Force hmalakna leh rawtnate hi Department pahnihte hian thlir zui zel tur niin a tul angin hma an la chhunzawm zel ang.

Meeting khaikhawmna neiin Pu F. Rodingliana, Minister, Commerce & Industries, etc chuan he hmalakna hi thangtharte leh ram tana hmalakna bultanna pawimawh tak a nih thu leh Department official-te pawh rawngbawlna rilru pu-a dik tak leh huaisen taka hma la turin a chah a ni. He meeting ah hian Commerce & Industries Deptt leh Land Revenue & Settlement Deptt-a Secretary, Director leh Officer pawimawh hrang hrangte an tel a ni.