1823/2025-2026

Lunglei, 2025 Khuangchawi thla ni 9: Vawiin khan Green Mizoram Day 2025-a Lungleia sawrkar department leh pawl hrang hrangte thing phun, enkawl zui leh tihfai chhoh mek chu Environment, Forests & Climate Change (EF&CC), Lunglei Division-a thawkte chuan enfiahin, sam fai ngaite an sam fai bakah, thing phun dinhmun an zir chiang.

Lunglei District Level Committee on Green Mizoram (DLCGM) thu chhuak bawhzuiin Lungleia sawrkar department leh pawl hrang hrang chuan kumin Green Mizoram Day-a Lunglei tui lakna hnar, Pukpui ram chhung Tlawng leh Pialthleng panna kawngpui sira an thing phun chu September ni 22 aṭang khan an tifai hlawm a. EF&CC-a thawktute zir chianna aṭanga a lan danin, GMD 2025-a sawrkar department, zirna in leh pawl hrang hrang 56 te thing phun 1,200 vel bawr chu dam kim vekin, a la nung ṭha hlawm hle.

Thing phuntu department leh pawl hrang hrangte'n an thing phunte ṭha taka an enkawl zui avangin Lunglei District Level Committee on Green Mizoram chuan lawm thu a sawi a. An thing phunte a puitlin ngei theih nan ṭha taka enkawl zui turin a ngen nghal bawk.