1822/2025-2026

Dated Aizawl, the 9th October, 2025: Vawiin khan State Council of Educational Research and Training (SCERT) hnuaia Special Education Cell bultumin vohbik naupangte tan ‘Colours of Inclusion 2025 - Fest for Special School Children’ chu SCERT Office kawtzawlah hman a ni a. Pi Caroline Zoramthangi, SCERT Director chu khuallian a ni.

Khuallian Pi Caroline Zoramthangi chuan he Festival huaihawt a nih chhan sawiin, vohbik naupangte’n khawtlanga inthlahrung lova nuam ti taka an awm ve theih a pawimawh tih leh activity hrang hrang hmanga naupangte mahni inrintawkna siamsak te, midangte nena chenho thiam leh thian kawm thiam zirtir nan te, an taksa, rilru leh hriatna chi hrang hrangin hma a sawn theih nan te a pawimawh tih a sawi a. Vohbikte chu thil ti thei lo, infiam thei lo, thian kawm thei lo anga ngaih an ni thin chu thiah a hun tawh thu sawiin, vawiina naupang kalte leh a hruaitu nu leh pa leh zirtirtute hnenah lawmthu a sawi a. Director kaihhruainain vawiin atana thu chham, "Today is a special day. Every child can learn. Every child deserves to be celebrated," tih chu sawi rual a ni bawk.

Special Education Cell hi 1986 khan SCERT hnuaiah din a ni a. He Cell-in a tum ber chu Mizorama Inclusive Education tihchangtlun leh hmasawntir a ni a. Vohbik naupangte hmasawnna ngaihtuah leh an mamawh chi hrang hrang inang lo tak takte phuhruksak an nih theih nana hmalakna pakhat atan he festival hi huaihawt a ni.

Programme hi Pi Zoramthangi Ralte, Joint Director chuan kaihruaiin, vohbik naupang leh zirtirtu lo kalte lawmna thu a sawi a. He Festival-ah hian naupang intihhlimna hrang hrang dah a ni a, a zai duh tan pawh nilenga an zai theihna tur stage siam niin, vohbik school naupangte thilsiam phochhuahna tur stall eng emaw zat siam a ni bawk.

He Festival-ah hian sikul paruk (6): Govt. Primary School-II, Durtlang; Special Blind School, Durtlang; Redeem Garden; Ephatha Special School; Gilead Special School; leh Shining Star School atangin naupang 119 an tel a ni.