777/2025-2026

Dated Kolasib the 9th June, 2025: Vawiin chawhma khan Kolasib DC Conference Hall-ah, Kolasib Bawrhsap Pu Robert C. Lalhmangaiha kaihruaiin 'Green Mizoram Day 2025' Kolasiba hman dan tur relin thutkhawmna neih a ni a. He thutkhawm hi Environment Forest & Climate Change (EF&CC), Kolasib Forest Division huaihawt niin Green Mizoram Day puala thingtiak 250 chuang phun dan tur he hunah hian rel a ni.

Kolasib DC chuan he thutkhawmna a kalkhawmte hmaah thusawiin thingphun leh ramngaw humhalh kawnga Sawrkar hmalak chu theihtawpa thlawp turin a sawm a. Green Mizoram Day hman thin chuan ramngaw humhalh leh thing phun pawimawhna thuchah mipuite hnena a thlen zel a beisei thu a sawi bawk.

Pu Jonathan Lalhruaitluanga, Assistant Conservator of Forest (ACF) chuan Green Mizoram Day Kolasiba hman a nih tawh dante Report a pek bakah Environment Forest and Climate Change (EF&CC) Kolasib Forest Division hmalaknate tarlanna hun a hmang a. Kolasib Forest Division hnuaia Forest Range hrang hrangte hmalakna in, nikum Green Mizoram Day pualin Sawrkar, mimal leh pawl hrangte'n thingphun hnatlang an neih thu ngaihthlak a ni bawk.

He thutkhawmna ah hian Green Mizoram Day, 2025 Kolasiba hman dan tur rel niin, June ni 11 ah neih tura rel a ni a. Jawahar Navodaya Vidyalaya(JNV), Thingdawlah thingtiak 250 phunna neih nise tih a ni a. Green Mizoram Day pual hian Kolasib District chhunga kangmei ven kawnga hma la tha khaw pathumte hnenah lawmman hlanna neih nise tih a ni bawk.