778/2025-2026

Lawngtlai, 9th June 2025 : Vawiin chawhhnu dar 1: 00 PM khan Lawngtlai District tana Pradhan Mantri Dahrti Aaba Janjatiya Gram Utkarsh Abhiyan (PM DAJ-GUA) hnuaia ' Awareness and Saturation Camps' kalpui  dan tur sawihona DC Office Chamber-ah neih a ni a. Pu Cheemala Siva Gopal Reddy, IAS, Lawngtlai bawrhsap chuan thutkhawm hi a kaihruai.

Pu Cheemala Siva Gopal Reddy, IAS, chuan Mizorama Tribal population a san avangin PM DAJ-GUA  tha taka kalpui a nih chuan ram leh hnamin nasa takin hmasawnna a hmu thei dawn a ni, a ti a. Hmasawnna kalpui tur hrang hrang zingah kawngpui leh a kaihhnawih siamthat, buh leh thlai thar lama hmasawnna te, zirna tha a awm theihna tura hmalaknate bakah hriselna kawnga hmasawnna tur hrang hrangte chu ngaihpawimawh zual a nih tur thu a sawi. Bawrhsap chuan Lawngtlai district mipuiten PM DAJ-GUA kaltlanga hamthatna an hmuh a, chhungkua leh khawtlangah hmasawnna thlen turin 'Awareness and Saturation Camps' tha leh changtlung taka kalpui a pawimawh tak zet a ti a. Sawrkar Sheme hrang hranga hamthatna dawng thei, tun thlenga la dawng lote zawnchhuah a, hamthatna an dawn ngei theihna tura   theihtawp chhuah turin line department zawng zawngte a chah  nghal bawk.

PM DAJ-GUA hnuaia ' Awareness and Saturation Camps' hi June ni 15, 2025 atanga June ni 30, 2025 chhung kalpui a ni dawn a. Lawngtlai District - ah chuan Lawngtlai RD Block, Chawngte RD Block, Bungtlang ' S' RD Block leh Sangau RD - Block ah te ni bik ruatah kalpui a ni dawn a ni.

Thutkhawmah hian  PM DAJ-GUA hnuaia project pawimawh tak pahnih - Upgradation of Tribal School/ Hostel or Government Residential School leh Establishment of Tribal Multi- purpose Market Centre ( TMMC) chungchang sawiho nghal a ni a. Project pahnihah hian proposal felfai tak siam ni se tih niin, ni 16, June 2025 ral hma ngeia Mizoram sawrkara  Planning and Programme Implementation Department hnena  thehluh  tura hmalak ni se an ti bawk.

Vawiin thutkhawmah  hian Line Department - hotute an tel tha hle a, Pu Cheemala Siva Gopal Reddy, IAS, Deputy Commissioner, chuan lawmthu sawina neiin hun a khar.