779/2025-2026

Lunglei, 2025 Nikir thla ni 9: Vawiin khan Lunglei District SDC Steering Committee chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District chhunga kawṭhalo (diarrhoea) vanga naupang thihna a thlen lohna tura ni 45 (June 16 - July 31, 2025) chhung beihpui thlak, Stop Diarrhoea Campaign (SDC) kalpui dan tur an sawi ho.

He hunah hian Lunglei District Immunisation Officer (DIO) Dr Christina Zonunmawii chuan Stop Diarrhoea Campaign kalpui a ṭul chhan leh he campaign kalpui tura ruahmanna awm sate a tar lang a. SDC chu kawṭhalo vanga naupang kum 5 hnuai lam thihna thleng ṭhin venna tura ruahman a nih thu tar langin, tun dinhmunah India rama nau piang (kum 5 hnuai lam) 1,000 zela 28 chu kawṭhalo vanga an la thih ṭhin thu leh hei hi kum 2030-ah chuan 23-ah tal tihniam tura beih mek a nih thu a tar lang a. Naupanga kawṭhalo vanga thihna a thlen loh nan hian kum 2014 aṭang khan kum tin fur thlen hma chawlhkar hnih chhung Intensified Diarrhoea Control Fortnight (IDCF) hmangin kawṭhalo laka inven dan inzirtirna kalpui a nih bakah, ORS (Oral Rehydration Solution) leh Zinc Tablet te sem ṭhin a nih thu tar langin, kuminah hian ngawrh zawka beihpui thlak turin Stop Diarrhoea Campaign hi kalpui tum a nih thu a sawi.

District Bawrhsap Pi Navneet Mann chuan kumina Stop Diarrhoea Campaign kalpui tur hi Lunglei District chhungah hlawhtling taka kalpui a nih theih nan a kaihhnawih department hrang hrangte chu mahni zawnah ṭheuh theih tawp chhuah turin a chah a. Lunglei District tana campaign kalpui tur hi June ni 16, 2025 (Thawhṭanni)-ah anganwadi centre remchangah District Bawrhsap hovin a bul ṭanna hun hman ni se, tih a ni.

DIO report aṭanga a lan danin, nikum 2024-a IDCF kalpui chhung khan Lunglei health district (Lunglei District leh Hnahthial District inkawp) chhungah kawṭhalo ven/enkawl nan ORS leh Zinc tablet pek tur naupang kum 5 hnuai lam 14,408 tinzawn niin, mi 14,661 (101.76%) hnenah pek a ni a. Kumina SDC kalpui chhung hian Lunglei leh Hnahthial district-a naupang kum 5 hnuai lam 14,962 tinzawn leh an ni a. ORS bawm (packet) 2 zel leh Zinc tablet mum 14 zel pek tura ruahman a ni a. Kum dang ang bawkin, kawṭhalo ven beihpui thlak chhung hian anganwadi centre, sikul leh damdawi in hrang hrangahte ORS & Zinc Corner siama damdawi (ORS & Zinc) sem hi kalpui a nih dawn bakah, kawṭhalo ven dan leh enkawl dan te, tui thianghlim in leh hman pawimawhna te, kut sil fai pawimawhna leh kut sil fai dan te, faina leh thianghlimna chungchanga naupangte leh anmahni enkawltute tana hriat tur pawimawh hrang hrang inzirtirna te buatsaih leh a ni bawk ang.

Health department report aṭanga a lan danin, nikum 2024 April thla tir aṭanga kumin 2025 March thla tawp thleng khan Lunglei District chhungah naupang kum 5 hnuai lam kawṭhalo vei 763 hriat chhuah niin, ORS 883 leh Zinc tablet 744 pek chhuah a ni a. Kawṭhalo vanga thi erawh an awm lo thung. April 2024 - March 2025 chhungin Lunglei leh Hnahthial district-ah nau piang 2,368-ah naupang kum 5 hnuai lam thi 43 awmin, nau piang 1,000 zelah naupang kum 5 hnuai lam 18.16 thi ang a ni a [child/under-5 mortality rate (CMR/U5MR) = 18.16]. An zinga 38 chu nausen (kum 1 hnuai lam) niin, infant mortality rate (IMR) hi 16.05 a ni a; thla khat tling lo 23 awmin, neonatal mortality rate (NMR) hi 9.71 a ni thung.