Green Mizoram Day 2017 hmanna pui ber chu Chief Minister Pu Lal Thanhawla, Chairman, State Level  Committee on Green Mizoram ni bawk hovin tukin zing khan Chite Lui Kam, Ramthar leh Thuampui inkar Lei bulah hman a ni a. 

Vawiina Green Mizoram Day hmannaah hian Mizoram Legislative Assembly Speaker Pu Hiphei; School Education  Minister Pu H. Rohluna; Sericulture Minister Dr. BD Chakma; Assembly Deputy Speaker Pu R. Lalrinawmna; Parliamentary Secretary - Pu K. Lalrinthanga, Pu Joseph Lalhimpuia leh Lt. Col.(Rtd.) Z.S .Zuala te; anni bakah Sawrkar hotulu Secretary-te leh mi pawimawh dangte an tel a. Green Mizoram Day pualin helai hmuna thing phunna hun 'Ceremonial Planting'  neihah Chief Minister leh Sawrkar mi pawimawh ten thing tiak an phun a. Chief Minister thingphun hi May ni 18, 2017 a boral ta Union Minister Enviromment & Forests changtu Pu Anil Madhav Dave a hriatrengna atan a ni. 

Chief Minister Pu Lal Thanhawla chuan mipui nawlpui, thangthar leh pawl hrang hrang ten ram siamna leh humhalhna kawnga thinphun nachang an hria te, hemi kawnga hriatna(awareness) an neite leh phunsa te humhalh leh enkawlna lama an thanharh hi thil lawmawm tak a ni a, an pung chho zel te hian changkanna a kawk a ni, a ti a. YMA leh kawtlang te pawh hemi lama thangharhna neia ramngaw, nungcha leh sava leh lui dungte an humhalh hi harhna pawimawh tak a ni tih a sawi bawk. 

Sawrkar anga hmalak chu a tawk mai lova, kan zavaiin he thilah hian mawhphurhna leh tih tur kan nei a, ram kan humhalh loh chuan nakinah kan thlan koa kan tu leh fate atangin anchhia kan hlawh ang tih a hlauhthawnawm a ni, a ti a. Tunhma Chite lui leh a kam awm dante a mitthlaa sawiin amah ngei pawhin helai hmuna len an den leh an zar thin thu te a sawi a, naupan laia an tual tlatna hmun ber a ni tih a sawi bawk a. Khawpui thang zel leh hmasawnna in Chite lui a ti bawlhhlawh ta chu  vanduaithlak tiin tunah Governor, Aizawl DC leh mi thahnemngai ten he lui chhanna atana an din Save Chite Lui Movement chu thil lawmawm tak anih thu a sawi a. Helai hmunah kumina Green Mizoram Day hman pawh he luite tihthianghlimna leh enkawlna atan ngaihtuahna senna rah anih thu a sawi a. Helai hmuna mimal ram nei ten an ramah thing phun phalna an pe chu lawmawm a tih thu a sawi bawk a ni.  

Khawpui thang zelah bawlhhlawh sawngbawlna chu thil pawimawh tak anih thu sawiin tunah hian Solid Waste Management lamah harsatna kan tawk a, a tih dan tur ngaihtuah mek niin hma kan la mek a, hemi rual hian recycling te pawh kan ngaihtuah tel mek a ni, a ti. Sawrkar leh mipui zah lova lo hal leh vat thin ten kawngpui road reserve thleng thlenga lo an vat leh kawngsira thing phun lian tha tak tak mai an hal hlum thin chuan a rilru an tih nat thin thu sawiin hetiang tih hi bansan turin mipuite a chah a ni. 

Chief Minister hian kangmei venna kawnga District ti tha te leh Aizawl District huam chhunga mei kawng sial a khaw ti tha te ber te hnenah lawmman a hlan a. Kangmei venna kawnga ti tha ber chu Kolasib District niin, pahnihna chu Lunglei District an ni a, pathumna chu Sechhip District a ni a. Aizawl District-a kangmei venna kawnga khaw ti tha ber chu Phulmawi niin, pahnihna chu Saitual VC III an ni a, pathumna chu Sihmui an ni a. District ti tha ber hian lawmman cheng 50,000 bakah thuziak leh Khitea Running Trophy  an dawng a  District dang leh khua ten thuziak leh lawmman pawisa fai an dawng bawk a ni. 

Vawiin programme ah Chief Minister hian Green Mizoram hman tirh kum 1999 atanga nikum 2016 thlenga hmalakna leh hmasawnna tarlanna bu 'Green Mizoram 1999 - 2016' tih chu a tlangzarh nghal a ni. 

Vawiina Green Mizoram Day hun kaihruaitu Chief Secretary Pu Lalmalsawma chuan kumina Green Mizoram Day hmanna Chite Lui kamah buatsaihin helai hmun chhanchhuahna kawnga rah tha a chhuah ngei a beisei thu  a sawi a. Principal Chief Conservator of Forests leh Member Secretary, State Level Committee on Green Mizoram ni bawk Pu Lalram Thanga chuan inlawmna thu sawiin Green Mizoram Day tobul leh hman chhoh anih dante, hemi hnuaia hmalakna leh hmasawnna awm te sawiin a hnen atangin hemi chungchangah hian report ngaihthlak a ni a, A report ah hian hmun hrang hranga hun hmasa lamah Green Mizoram Day puala thingphun te dinhmun a tarlang a. Chite lui humhalhna atan Pollution dan awmsa chu a tul anih chuan hman dan kawng ngaihtuah a tul mai thei tih a sawi bawk.  Chief Wildlife Warden Pu Liandawla'n lawmthu sawiin hun a khar a ni. 

Report a tarlan danin Green Mizoram Day hman tan 1999 atanga 2016 thleng khan thingtiak 36,58,174 phun a ni tawh a. Kum 2013 atang hian thingphun te a nung zui em tih chhinchhiah tan a ni  a. Kum 2013 a, thing tiak 72,241 phun atangin za zelah 62 chu a nung a; 2014 a 98,632 phun atangin za zelah 58 a nung a; 2015 a thing tiak 81,233 phun atangin za zelah 70.53 a nung a, 2016 a thing tiak 1,23, 405 atangin za zelah 81.06 a nung a ni. 

Green Mizoram Day, June ni 11 kuminah Chawlh Ni anih avangin vawiina hman chu State Level Committee in remchang ber tiin hman an lo rel lawk tawh a. Vawiina Green Mizoram Day hi thuang hnih a hman niin zing dar 7:00 AM lamah a programme hawnna leh ceremonial planting neih a ni a. Zing dar 9:00 ah khan a hu hovin Planting Agencies 55 - Sawrkar Department leh pawl hrang hrang ten thing tiak 1200 bawr vel helai hmun hectare khat leh a chanve velah zaua hian an phun a. Pachhunga University College leh Government T Romana College zirlai 50 ve ve ten Chite lui dung thian fain an hnatlang bawk a ni.