Lunglei District-a Green Mizoram Day 2017 chu Pukpui Centenary Lungphun hmunah vawiin chawhma khan hman a ni a, Horticulture Minister Pu PC Lalthanliana chu Khullian a ni. 

Pu PC Lalthanliana chuan khawvel a thang kan tih hian, kan rilruin hmasawnna ruhrel emaw thiamna lama hmasawnna a tinzawn thin a, mahse thing leh mau  tello chuan engmah a nilo thei a ni, a ti a. Sik leh saa kan khawvel lo la kal zel tur ti nuam tur chuan thing kan phun a ngai a ni, a ti. Thing kan phun te hi sawrkar, department leh pawl ang chauhva vei lovin, mimal tinte hian kan thinlung taka vei in, kawngkam mai nilo, mahni khawchhung, khawtual leh inbul ah te thing phun kan uar a tul a ni, a ti bawk. 

He hawnna inkhawm hi Pu H. Lalrinpuia, SDO (Sadar)-in a kaihruai a. Lunglei District Green Mizoram Committee Secretary Pu H. Lianmawia, DFO chuan report a pe a, kangmei ven hnathawk tha thlanchhuah zingah Lunglei District pahnihna a nih thu a tarlang a ni. Kumin hian planting agency 70 an awm a, thingphunna tur plot 27 siam tharah thing 517 phun belh tura ruahman a ni. 

Heng bakah hian thing phun enkawl tha leh kangmei veng kawnga hnathawk tha te hnenah lawmman semna neih nghal a ni a. Mizoram Polytechnic Lunglei, BDO Lunglei leh NSS Government. JB College te chu a indawtin planting agency titha ah thlanchhuah an ni a. Zobawk S’ VC, Mausen VC leh Upper Lungrang South VC ten village level-a kangmei ven kawngah lawmman an dawng a. Hlimthla, Calathea leh Zochhiar te pawhin kangmei ven kawnga chanchinbu titha lawmman an dawng a ni. 

He hawnna inkhawm neih zawhah hian Khullian, DFO leh SDO (Sadar) ten thingphunna, ceremonial tree planting an nei bawk a ni.