Hawnna thu sawiin Pi Niharika Rai chuan, kan chenna boruak tinuam turin thing leh mau kan humhalh bakah tha tharin thing tam tak phun ila, ram hring nuam hian mihringte min tihlimin hriselna min pe a, nitin kan khawsaknaah kan mamawh ei tur, thingtuah, tui hna te min pek bakah kan ram leilung pawh a ti nghetin kan sik leh sa awmdan pawh thui tak a titha a ni, a ti a. Ram hring nuam siam turin mitinin tan la ila. Green Mizoram Day boruakah chauh nilo, engtik lai pawhin thing phun kawngah hian tan i la ang u, tiin amah ngei pawh ram hring thing leh mau mawina hre chunga seilian a ni tih Pi Rai chuan a sawi a ni. Thal liam ta a Kolasib District chhunga ram kang venna kawnga thawk tha 3 te DC chuan he hunah hian a piang bawk a, chungte chu : (1) Hortoki, (2) Kawnpui leh (3) N. Chawnpui te an ni.

Green Mizoram Day hawnna inkhawm hi Pu Zairemmawia, Addl. DC chuan a kaihruai a. Pu Lalthlamuana Pachuau, DFO chuan District chhunga Green Mizoram Day kalpui dan sawiin kuminah hian District pumpuiah thing tiak 7000 vel phun a ni dawn tih a sawi a. Kolasib khaw chhung bikah chuan  Sorkar department hrang hrang ten anmahni remchan danin an phun dawn a, an phun tur Department hrang hrangin Forest Department hnena an thlen zat chu tiak 3500 a ni, a ti.

Pu Lalthianghlima, President, MUP Sub Hqrs. chuan thuchah a sawi bawk a Pi Lalnunziri Daniels, Principal, Govt. Kolasib College chuan lawmthu sawiin hun a khar a ni.

He hunah hian Department hotute an kal tha hle a, sikul naupang thahnem tak an tel bawk a. Inkhawm zawh hian Department hrang hrangten anmahni puala thing phun tur an la nghal a ni.