Mizoram Deficit Mission School Association (MDMSA) ten sorkara thil ngiat an neih chungchanga thil awmzia hrechiang tura palai hnathawktu, Synod Hruaitute chuan vawiin khan Chief Minister Office's Cabinet Room-ah Chief Minister Pu Lal Thanhawla leh sorkar hotu lu te nen meeting pawimawh tak an nei.





Chief Minister Pu Lal Thanhawla chuan thil awmdan hrechiang hmasa lova sorkar nawr hi sorkar duh loh zawng anih thu sawi hmasa in, thil tih awmte hi tih duh loh vang leh luhlul vang nilovin a tlin loh zawk vang maiin a ti lo thin a ni a ti. Sum leh  hunin a daih phawt chuan a ti puitling zel ang a ti.

Meetingah hian MDMSA tena sorkarah thil phut an neihte chu sawiho a ni a.Education Minister Pu Lalsawta chuan Kohhran enkawl school te hi Managing Board hnuaia awm, sorkar dan piahlama in enkawl an ni chungin, an in enkawl dan hi a that tawk avangin sorkar chuan autonomy thui tak pein, a inrawlh vak lo a ni a ti a, administrative control phei chu a nei miah lo a ni a ti. Chuvangin mumal zawk leh tha zawk,  tuna dan siam tum mek, draft stagea la awm mekah hian deficit an nihna anga tanpuina pek thin leh zirtirtu thenkhat hlawh sorkarin a tum sak thin dan kallai hi siam tha a, Managing Board hnena  thu neihna pumhlum pek tumna a nih thu a sawilang a. Hei hian an school zirtirtu zawng zawngte rualkhai takin a thunun thei dawn a ni a ti. Hetih lai hian draft stage chauh a la awm si, engtinnge MDMSA te hian an lo hriat a, hlauhthawnna an neih tih chu mak a tih thu a sawi a. Deficit schoolte chanvo hi tihdanglam tumna a awmlo a ti. Education Secretary Pi Esther Lalruatkimi pawhin thil awmdan chiangkuang hre silova in nawr nghal ringawt hi thil fuh ber a nilo a ti bawk.

MDMSA thil ngiatte chu sawihoin, pension benefit chungchangah central sorkarin ni 1.9.2010 a sorkar hnathawk lak tharte hnena pension pek a tih tawp tak avang leh deficit school enkawlna danah pension pek theih thu a awm loh avangin pension siam  theih anih loh thu sawiho a ni a. Contract teacher te regularised sak chungchangah Chief Minister chuan department dangah pawh tam tak hetiang dinhmuna ding an awm ve tho avangin abika ngaihtuah (in isolation) theih a nih loh thu a sawi a.6th Pay hman chungchangah hian anmahni ang thoin polytechnic a thawkte pawh la pek loh an nih thu sawilangin, la pek tur tho an ni a, tunah hian finance department nen indawr chhoh mek reng a nih thu sawilan a ni bawk a. School department hnuaia zirtirtute hlawh tur mamawhzat kum 2011 - 2012 chhung atan cheng nuai 3904.8 anih laiin budgeta awm chu cheng nuai 2825.6 chauh anih thu tarlan a ni a.Nikum leiba December 2010 - February 2011 pek anih avanga sum an indaih dawn loh thu tarlan a ni bawk a. D.A. arrear 26 % pek chungchangah pek remtih a ni a, senso tur chhut chhuak nghal turin an ti a ni.

Meetingah hian school department-a officer pawimawhte an tel bawk a ni.

Attachment

  • Loading attachment...