District Level Green Mizoram Committee, Kolasib buatsaihin vawiin khan Green Mizoram Day pualin hun Environment Forest & Climate Change (EF &CC) Department Complex, Project Veng, Kolasib-ah District Bawrhsap hovin hman a ni.

He ni puala hun hmanah hian District Bawrhsap Dr. Arun T. chuan kan chenna khawvel boruak vawn thianghlim leh kan thlah kal zel ten boruak thianghlim hip tur an neih theih nan mimal tinin mawh kan phur a ni tih inhre thar theuh ila a ti a. Mizoram chu India ram hnamdang aiin boruak thianghlim a tam zawk nia a hriat thu sawiin, hemi kawnga Environment Forest & Climate Change Department leh YMA, VC te leh tlawmngai Pawl hrang hrang te thawhhona leh hmalakna te chu chhuanawm a tih thu a sawi.

Green Mizoram Day hi 9th June, 2017 a hman tura duan lawk ni mahse rokhawlhna avangin hman theih a nih loh avangin, vawiin hian hman a ni ta a ni. He ni pual hian thing tiak 50 EF & CC Complex-ah phun a ni a, kumin hian phun tam ngawr ngawr aiin enkhawl zui theih ngei tur phun thupui a nei chungin phun a ni.

Vawiin hun hmanah hian Kolasib District-a Kangmei ven kawnga hmala tha khaw pathum hnenah lawmman pek a ni a, hetiangin :

1. N. Hlimen        -    Thuziak    +    Rs. 50,000/-

2. Meidum        -    Thuziak    +    Rs. 30,000/-

3. Lungmuat        -    Thuziak    +    Rs. 20,000/- pek an ni. Mizoram pumah Kolasib District hian kangmei ven kawnga hmala thaber lawmman a dawng bawk a ni.

Green Mizoram Day puala hun hman pah hian ‘2017 World Day to Combat Desertification’ pualin hun hman nghal a ni a. ‘Kan Ram, Kan Chenna, Kan hma hun tur’ tih thupui a neih a ni.

He ni puala hun hman hi President Sub. Hqtr. YMA, Kolasib in kaihhruaiin, Pu C.Vanlalena DFO, Kolasib-in hmalak dan hrang hrang kalkhawmte a hriattir a ni.