Vawiin chawhma dar 11:00 khan Lunglei Pukpui Centenary Lungphun hmun ah Green Mizoram Day Thingphun Programme neih ani.He hun ah hian Lunglei DC kal chhuak tur Pi M.Zohmingthangi, IAS chu Chief Guest niin DFO Pu Kawlhnuna'n Programme  a kaihruai. Vawiin Green Mizoram Day ah hian Lunglei District a sawrkar Deptt. leh NGO's ten thingtiak 1300 aia tam mah Pukpui atanga Saza tlang peng inkar kawngpui dung ah an phun nghal a ni.

Lunglei DC chuan Lunglei District enkawltu mawhphurhna sawrkar in a chantir a tangin Model Dist. a Lunglei a awm theih nan sawrkar hnathawk te leh NGO's te nen lungrual takin ke an penho reng thin thu a sawia. Kawng tam tak ah Lunglei District chuan hmasawnna hmu in, Fire Prevention week hmanthat chungchangah Mizoram ah pakhatna(1) an  lo nithei ta pawh chu Pathian kaihhruaina leh thawhhona tha a awm vang a ni a ti.

DC in Programme a hman zawh hnu hian Ceremonial Tree Planting Pu Joseph Lalhimpuia, Vice Chairman HPC, Lunglei DC leh DFO, Pu Kawlhnuna ten neiin Thingphun hnatlang neih tan nghal a ni. Lunglei District  MJA te pawn Thingphun enkawl zuiturin Department  te ngen nghal in- hnathawk tha te pawh an la tarlan turthu an sawi bawk a ni.