Serchhip District Bawrhsap thar Pu P.Lalchhuanga, MCS chuan vawiin chawhnu dar 1 khan DC's Meeting Room-ah Serchhip District chhunga Sawrkar Department hrang hrang enkawltute kokhawmin inhmelhriat tawnna leh inkawmhona hun a hmanpui.

Bawrhsap chuan Serchhip District chu 'model district'-ah siam theih ani tih sawiin hemi tihlawhtling tur chuan Department hrang hrangten thawhhona tha leh hrisel an neih a tul a ni a ti a, mipui rawngbawlna kawngah inthlunzawm vek an nih avangin an pawimawhna a inchen theuh a, thawhhona tha an neih pawh a pawimawh em em a ni tih thu sawiin, Serchhip District hmasawnna hna an thawhna kawng a harsatna an neih chuan theihtawp chhuaha pui tura a inpeih reng thu a sawi bawk.

Bawrhsap chuan Serchhip District chhunga NLUP tihhlawhtlin chu a ngaihpawimawh ber pakhat anih thu sawiin, mipuite tana rawngbawlna pawimawh tak ani tih hre reng tur leh a hlawhtlinna atan nasa lehzuala tan la turin Department hotu kalkhawmte chu a chah a, tun dinhmunah chuan Serchhip bawrhsap atan a ruat lailawk (stop-gap arrangement) mai anih avangin eng chen nge Serchhip-ah a awm dawn tih a hriat loh thu leh a awm chhung a hmasawnna hna a tam thei ang ber  thawh a duh thu a sawi bawk.

Pu P.Lalchhuanga hian June ni 10, 2011 khan Serchhip District bawrhsap ni tura mawhphurhna a la a, vawiina inkawmhona hunah hian District chhunga Department hrang hrang venkawltute an tel kim hle a ni.