"Green Mizoram Day" pualin Saiha khawpui chhung leh district chhung kawngpui dung ah te thingtiak phun  beihpui thlak ani. Thingtiak phun beihpui thlak hma hian a hawnna inkhawm tawi Circuit House, Saiha-ah zing dar 9 :30 khan neih a ni a, tlawmngai pawl hrang hrang hruaitute leh department hrang hrang hotute an tel kim hle a ni. He inkhawm tawi neih hi Pu Solai Azyu, Assistant Conservator of Forest, MADC chuan a kaihruai a, District Bawrhsap Pu Kunal IAS chuan thu sawiin Saiha khawpui in fur leimin nasa tak kan tawrh thin te leh nipui laia tui harsatna namenlo kan neih thin te hi kan ramngaw te kan tih chereu nasat lutuk vang ani tiin ramngaw te hian min hualveltu boruak an tithianghlima an tih mawi mai piah lamah khuarel chhiatrupna "Natural Calamity" hrang hrang lakah min veng him thei a ni a ti a, District chhung Motor kawngpui dung leh Saiha chawmtu tuihnar leh ramruak ah te kum dang zawng aia thingphun uar anih tur thu a sawi a, thingphun nun tawh sate pawh humhalh tlat turin kalkhawmte chu a chah a ni. Bawrhsap hian D.C. Bungalow Gate bulah thingtiak hi a phun nghal a ni.

Thingtiak chi hrang hrang phun tur te hi MADC, Forest Department chuan, a thlawmin a pe chhuak a, Saiha District a Tuipang Block tan thingtiak 1800/- leh Saiha Block tan thingtiak 2300/- a sem chhuah mai bakah Thingtiak pakhat Rs.  10/- zelin a duh apiangte tan  a hralh chhuak bawk. Heng thingtiak te hi department hrang hrang te ram chhung ah leh School hrang hrang Compound ah te, Kohhran hote hnenah an Biakin bul hnaia phun turin a pe chhuak hlawm ani. Thingtiak te hi heng hmun hrang hrang-Tlangpui tui hnar, Circuit House panna kawng, Police Complex, Government High School Compound, BDO Office Compound, KVK Complex  leh Civil Hospital kiang vel-ah te hnatlang a phun a ni a, thingphun hnatlangah hian tlawmngai pawl hrang hrang leh department hrang hrang hnathawktu  mi thahnem tak an thawkchhuak a ni.