Vawiin khan karleh Thawhtanni June 27,2011 a Khawvel pum huap a Ruihhlo dona ni 'International Day Against Drug Abuse and Illicit Trafficking 2011' hman dan tur chungchang ngaihtuahin Organising Committee Vice Chairman leh Social Welfare Department Secretary Pi B.Sairengpuii hovin a Chamber ah an thukhawm.
He beihpui thlak hi H&FW, Mizoram Police, Excise & Narcotics, Prison, Law & Judicial, UNODC, MSACS, MRHG, CYMA, School Education, Social Welfare Department, MSD&RB te tangrual a ruahman a ni a. He beihpui thlak Programme hi Vanapa Hall-ah Thawhtanni chawhma dar 11-ah tan a ni ang a, Khuallian Chief Minister Pu Lal Thanhawla a ni ang a, khual zahawmah Social Welfare Department Minister Pu P.C.Lalthanliana a ni ang.

Hemi ni hian thusawi tha tak tak mithiamte atangin ngaihthlak a ni ang a, zaithiam engemawzat an zai bawk ang. School Naupang ten Mass Rally an nei ang a. Zing dar 10 atangin Aizawl chhim lam atanga lo kal ten Sikulpuikawn atangin kawng an zawh ang a, Aizawl hmar lam atanga kawng zawh tur ten Millenium atangin Vanapa Hall thleng an zawh hlawm thung ang.