Vawiin khan Pu K.S.Thanga, Parliamentary Secretary, Agriculture, Horticulture, Minor Irrigation leh Soil & Water Conservation Department changtu hovin a Office Chamber-ah "Green Revolution" chungchang sawiho a ni. He meeting-ah hian AMFU hruaitute, Agriculture, Horticulture, Minor Irrigation leh Soil & Water Conservation Department-a Officer pawimawhte an kal tha hle.
He meeting-ah hian Mizoram hmasawnna atan ei leh bara intodelhna kawng zawn dan tur ngun takin an ngaihtuah a. Ram changkang zawk ten ruahmanna an lo siam tawh ang zulzui deuhva Green Revolution puan ve mai te pawh thaa an ngaih thu an sawi. Green Revolution atan hian thil pawimawh tam tak a awm a, Department pakhat emaw, pawl (N G O ) pakhat chauhvin emaw tihhlawhtlin theih a nih loh thu te sawilan a ni. A hlawhtlinna tur chuan Sawrkar thutlukna te, Technical mithiamte ruahmanna te, a thawktu tak tak tur loneitute an pawimawh zia te sawi ho a ni. Tin, heng baka thil pawimawh thei tur chi hrang hrangte sawi chhuah a ni a, chutiang tihlawhtling tur chuan Sawrkar dinglai hian nasa takin hma a la mek a, Chief Minister Pu Lal Thanhawla ngei pawhin hei hi a ngaihpawimawh ber a nih thu te, NLUP hnuaiah awmze nei leh ruahmanna fel tak hnuaia theihtawpa hma lak mek a nih thu te sawi chhuah a ni bawk a. Sawrkar hmalak mekna tihlawhtling tur hian a kaihhnawih department hrang hrang ten theihtawp chhuahin tan an lak mek thute pawh sawilan a ni bawk. He meeting hian NLUP hi a nihna ang tur taka hman a nih hunah Green Revolution thlenna atan a aia tha hmanraw dang a awm lo tih chu lungrual takin an pawm. A tul anga Seminar neih zui an rel bawk.
